Մոլդովայում սկիզբ առած ձերբակալություններն ու պետական համակարգի ստուգումները տեղի քաղաքական գործիչները համարում են քաղաքական ճգնաժամի արդյունք: Այդ վիճակը երկրում սկսվել է անցյալ շաբաթ կոալիցիայի փլուզմամբ: Քիշնևի քաղաքապետարանում երկրի հակակոռուպցիոն վարչության աշխատակիցները ձերբակալել են իրավաբանական վարչության աշխատակցին:
Կոռուպցիայի դեմ պայքարը վարվում է հիմնականում լիբերալ-դեմոկրատների կողմից առաջադրված վարչապետ Վլադ Ֆիլատի հանդեպ, ով անցյալ շաբաթ հայտարարել էր կոալիցիայի պայմանագրից դուրս գալու մասին: Դրանից հետո լիբերալ-դեմոկրատները կոմունիստների հետ միասին խորհրդարանում կողմ քվեարկեցին դեմոկրատների կողմից առաջադրված առաջին փոխխոսնակ Վլադ Պլախոտնյուկի հրաժարականին: Վարչապետը նաև նշել է, որ այս շաբաթ պատրաստվում է պաշտոնանկ անել այն նախարարներին, ովքեր չեն կարողանում իրենց պարտականությունները կատարել: Դեմոկրատներին և լիբերալներին պաշտպանելն այնքան էլ հեշտ չի լինի, քանի որ խորհրդարանից լիբերալ-դեմոկրատների գնալով, որոնք ունեին 31 մանդատ, նրանց 101 տեղից մնացել է 27-ը, իսկ 34-ը՝ կոմունիստներինն ու անկախ պատգամավորներինն է:
Նախարարները սկսել են մեկը մյուսին մեղադրել կոռուպցիայի, բարեփոխումներին խոչընդոտելու, եվրաինտեգրմանը խանգարելու մեջ: Իրավիճակն էլ ավելի է թեժացել, երբ արտգործնախարարը հայտարարել է, որ ԵՄ-ն այս տարի իրենց հետ չի կնքելու ո՛չ վիզային համակարգի հեշտացման պայմանագիր, ո՛չ ասոցացման համաձայնագիր, ո՛չ էլ ազատ առևտրի գոտի ստեղծելու պայմանագիր: Ակնկալվում էր դրանց ստորագրումը նոյեմբերին Վիլնյուսում կայանալիք Արևելյան գործընկերության գագաթաժողովին:
Մի շարք նախարարներ չարաշահել են իրենց պաշտոնեական դիրքը: ՆԳ նախարարի մոտ հայտնաբերվել է կեղծ դիպլոմ, մեղադրանքներ են ներկայացվել առողջապահության և ֆինանսների նախարարներին, անցյալ շաբաթվա ստուգումների արդյունքում ձերբակալվել է երկրի հարկային ծառայության ղեկավարը:
Ի պատասխան՝ լիբերալ-դեմոկրատներն իրենց անվստահությունն են հայտնել կոռուպցիայի դեմ պայքարի կենտրոնին և կոչ են արել դադարեցնել որոշ քաղաքական գործիչների և կուսակցությունների հրամանով իրականացվող անօրինական գործողությունները:
Ըստ փորձագետների՝ հնարավոր է այս իրավիճակում արտահերթ ընտրությունների անցկացում կամ նոր պայմաններով կոալիցիայի վերաձևավորում: Առաջին դեպքում մեծ է ձախակողմյան ուժերի` իշխանության վերադառնալու հավանականությունը: Իսկ երկրորդի պարագայում պատերազմող կողմերը պարտադրված կլինեն ԵՄ-ի ճնշման տակ հաշտվել: Այդ նպատակով այսօր Քիշնև են մեկնելու Մեծ Բրիտանիայի, Շվեդիայի, Լեհաստանի ԱԳ նախարարները, որոնք կփորձեն հաշտեցնել կողմերին:
