Երևանի քաղաքապետ Կարեն Կարապետյանը իր պաշտոնավարման 100 օրը ամփոփող ասուլիսում նշեց, որ իր համար քաղաքապետարանում «ահավոր» հետաքրքիր է: «Երբեք չեմ մտածել և առանձնապես ձգտում չեմ ունեցել քաղաքապետ աշխատելու: Ես սիրում եմ այս բառն օգտագործել`drive ունեմ քաղաքի կառավարման համար»: Անդրադառնալով այն հարցին, թե ինչու ինքը չի ընտրվել, այլ առաջադրվել է ՀՀԿ-ի կողմից, Կարապետյանը ասաց. «Համաձայն ընտրության հայեցակարգի, ես ընտրվել եմ ավագանու կողմից, դուք կարող եք ասել՝ դա վատ ընտրություն է, քաղաքացին ինքը պետք է իր ձայնը տա, բայց փաստն այն է, որ ավագանին է ընտրում քաղաքապետ, իսկ ավագանին ընտրել է ինձ։ Ճիշտ է, միակ թեկնածուն եմ եղել»:
Կարեն Կարապետյանը ասաց, որ դեռևս չգիտի՝ մասնակցելո՞ւ է հաջորդ ընտրություններին, թե՞ ոչ. «Որ ասեմ՝ այ էս պահին երազում եմ`չէ»: Անդրադառնալով քաղաքի կանաչ տարածքների պահպանմանը՝ Կարեն Կարապետյանն ասաց, որ այդ խնդիրը իրենց ուշադրության կենտրոնում է, բայց դա դեռ չի նշանակում, որ երևանցին արթնանալով՝ լսելու է աքլորի կանչ և գետի խշշոց: «Ի վերջո, մենք պետք է հասկանանք, որ ապրում ենք մեգապոլիսում»:
Հարցին, թե ինչո՞վ է ինքը տարբերվում նախորդ քաղաքապետերից, Կարապետյանը պատասխանեց`տեսքով:
