Մարկ Ցուկերբերգը շփվել է իր Facebook սոցցանցի օգտատերերի հետ: Մոտ 1 ժամ նա պատասխանել է նրանց հասարակ և ոչ այնքան հասարակ հարցերին:
Նրա ամբողջ ելույթը հասանելի է Facebook-ում: Vesti-ն ներկայացնում է մի քանի հետաքրքիր հարցուպատասխաններ:
– Ի՞նչ կարծիքի եք ցանցային չեզոքության սկզբունքի մասին: Ինչպե՞ս են դրա հետ համադրվում այնպիսի ծառայությունները, ինչպիսին internet.org-ն է, որը հասանելիություն է ապահովում համացանցում սահմանափակ քանակությամբ հնարավորություններին:
– Ցանցային չեզոքությունը անհրաժեշտ է, քանի որ ցանցում չպետք է լինի խտրականություն: Սակայն internet.org-ն օգնում է զարգացող երկրների մարդկանց, որոնք ընդհանրապես հասանելիություն չունեն համացանցին՝ գոնե միայն շփվելու ու տեղեկատվության փոխանակման հնարավորություն: Այդ պատճառով էլ internet.org-ի նման ծրագրերը կարծես համադրվում են ցանցային չեզոքության սկզբունքների հետ:
Internet.org-ը Ցուկերբերգի ու մի շարք բարձրտեխնոլոգիական գործարարների գաղափարն է, որը պետք է ապահովի ամբողջ աշխարհի «ինտերնետացումը»: Ցանցային չեզոքության սկզբունքը վիճահարույց թեմա է Ամերիկայում, որտեղ որոշ ընկերությունների ցանկանում են տալ հնարավորություն հավելյալ գումարի դիմաց ստանալ ավելի լայն ինտերնետ-ալիք:
– Ինչպիսի՞ն է Oculus նախագծի հանդեպ ձեր տեսլականը։
– Անգամ եթե մարդը հնարավորություն չունի ներկա լինելու ինչ-որ վայրում կամ դեմ առ դեմ շփվելու մարդու հետ, մեր խնդիրն է ստեղծել միջոց, որը թույլ է տալիս անցնել այդ խոչընդոտների վրայով:
Oculus Rift-ը վիրտուալ իրականության ակնոցներ են: Գնելով այն՝ Facebook-ը ծրագրում է տեխնոլոգիան օգտագործել ծառայությունների լայն սպեկտորի համար:
– Օրական քանի՞ ժամ եք դուք աշխատում:
– Նայած թե ինչը համարենք աշխատանք: Ես ժամանակի մեծ մասն անցկացնում եմ՝ մտածելով, թե ինչպես ցանցին միացնեմ ամբողջ աշխարհը, ու թե ինչպես ես կարող եմ ծառայել հասարակությանը, սակայն այդ խոհերի առյուծի բաժինը կատարվում է գրասենյակի պատերից դուրս ու ոչ թե գործնական հանդիպումների շրջանակում, որը դուք կանվանեիք իսկական աշխատանք:
Շատ ժամանակ ես ծախսում եմ կարդալու ու մտածելու վրա: Իսկ եթե հաշվենք այն ժամերը, որ ես անցկացնում եմ գրասենյակում, կստացվի ոչ ավելի, քան շաբաթական 50-60 ժամ: Իսկ եթե հաշվենք այն ժամանակը, որ ես ծախսում եմ մեր առաքելության իրականացման վրա, ապա դա իմ ամբողջ կյանքն է:
– Facebook-ը չի՞ վնասում իրական շփմանը:
– Ոչ, Facebook-ը ստեղծում է հավելյալ հնարավորություններ շփվելու այն մարդկանց հետ, որոնք ձեր կողքին չեն:
– Ո՞րն է հաջողության գլխավոր գաղտնիքը:
– Չհանձնվել:
