Նախընտրական քարոզարշավի 25 օրերի ընթացքում ՀՀ-ն փոխվել է, հասարակության մի մեծ հատվածի մոտ փոխվել է գիտակցությունը, վերականգնվել հավատը: Այս կարծիքին է ՀՀ նախագահի թեկնածու, «Ժառանգություն» կուսակցության ղեկավար Րաֆֆի Հովհաննիսյանը:
Ըստ նրա՝ դա կայացել է ոչ թե իր շնորհիվ, այլ հայ մարդն ինքն է որոշել, որ գալիք ընտրությունը ոչ այնքան թեկնածուների, անձերի, որքան հայ մարդու իրավունքի, սահմանադրական Հայաստան ունենալու հեռանկարի համար է:
«Երկու լավ բան ասեմ. ես արդեն գնահատել եմ, որ թեկնածուները, նախորդ քարոզարշավի համեմատ, մուտք ունեն հեռուստատեսություն, ինչը գնահատելի է և պետք է շարունակվի: Մենք նաև նկատում ենք, որ ահազանգերի ուղղությամբ շատ ուշացած, բայց գործ արվում է: ԿԸՀ-ն հայտարարել է, որ Ապարանի հիվանդանոցից հանվել են քարոզչական պաստառները, բայց ինչո՞ւ երկու օր առաջ:
Համատարած կերպով խախտվում է օրենսգիրքը: Ես պայքարից հրաժարվող չեմ: Հայ մարդը կողմնորոշվել է, փետրվարի 18-ին առաջին փուլով հաղթելու է, և ունենալու ենք նոր նախագահ, թեև սկսում են փող բաժանել: Եթե այսպես շարունակվի, և կրկնակի քվեարկության փորձ լինի, մենք հետևելու ենք, և յուրաքանչյուր ապացույցի դեպքում պատասխան են տալու»,- մեկնաբանեց Րաֆֆի Հովհաննիսյանը:
Նրա խոսքով՝ պարոն Սերժ Սարգսյանը շահեկանորեն տարբերվում է այլ պետական պաշտոնյաներից, ունի սովորելու, լսելու, սխալներն ընդունելու ունակություն. նա ցույց է տվել, որ ունի այդ հնարավորությունը, այդ պատճառով անհրաժեշտ է, որ պարոն Սարգսյանը մարզպետերի, քաղաքապետերի, գյուղապետերի միջոցով հանգիստ թողնի շարքային քաղաքացուն: Նրա պարտությունը չի լինելու իր պարտությունը կամ Րաֆֆի Հովհաննիսյանի հաղթանակը. դա ավելի կարևոր հաղթանակ է լինելու սահմանադրական երկիր կերտելու ճանապարհին, ավելի կարևոր, քան ցանկացած բանավեճ և խախտման վերացում:
Լուսանկարը՝ PanARMENIAN Photo-ի
