Իտալական Chi ամսագիրը հայտարարել է, որ դքսուհի Քեյթ Միդլթոնի տպագրված լուսանկարները որևէ կերպ «սկանդալային» համարել չի կարելի, և արտասահմանյան մամուլի արձագանքներն անհամարժեք են:
Ավելի վաղ բրիտանական թագավորական ընտանիքը դատապարտել էր իտալական ամսագրի կողմից դքսուհու լուսանկարների հրապարակման փաստը` նշելով, որ դա նրանց անձնական կյանքի իրավունքի լուրջ խախտում է:
Ամսագրի գլխավոր խմբագիր Ալֆոնսո Սինորինին հերքել է մեղադրանքները` հայտարարելով, որ լուսանկարներն արվել են հասարակական վայրում և, բացի այդ, նրանցում որևէ սկանդալային երևույթ չկա: Խմբագիրը նշել է, որ լուսանկարներում ընթերցողը կտեսնի ժպտացող, երջանիկ զույգին՝ հանգստի պահին:
Ամսագիրը, որի շապիկին կիսամերկ դքսուհին է, արդեն հայտնվել է Միլանի վաճառակետերում:
Բրիտանական ITV հեռուստաընկերությունը ներողություն է խնդրել եթերում ամսագրի շապիկը ցուցադրելու համար:
