Ֆրանսիայի արհմիությունների միավորումը «Ֆրանս Պրեսս» լրատվական գործակալության աշխատակիցներին կոչ է արել 24-ժամյա գործադուլ անցկացնել՝ ի նշան բողոքի Ֆրանսիայում և Աֆրիկայում գտնվող խմբագրական բյուրոների հանդեպ ղեկավարության վարած քաղաքականության դեմ: Այս մասին հայտնում է RIA Novosti-ն:
Արհմիությունները գործակալության ֆրանսիական և աֆրիկյան մասնաճյուղերի աշխատողներին առաջարկում են գործադուլը սկսել այսօր առավոտյան ժ. 08.00-ին (Երևանի ժամանակով՝ 11:00-ին):
Արհմիությունների կարծիքով՝ խմբագրական վերակազմավորումը ուղղված է միայն ֆինանսական միջոցների խնայողությանն ու աշխատատեղերի կրճատմանը: Գործակալության ղեկավարությունը հերքում է մեղադրանքներն ու նշում, որ արհմիությունների դժգոհությունը հարուցած երկու նախագծերը դեռևս համաձայնեցված չեն:
Ծրագրված վերակազմավորման պատճառով արդեն մեկ անգամ դադարել է աշխարհում հնագույն լրատվական գործակալության աշխատանքը. հունվար 31-ին աշխատակիցները գործադուլ էին արել ժ. 17:00-ից մինչև կեսգիշեր:
