«Նախընտրական գործընթացի և մեր նախաձեռնությունների առումով բավարար եմ համարում մեր քայլերը, մեզանից ինչ հնարավոր էր՝ արեցինք: Ցավոք, պատկան մարմինները ոչինչ չարեցին առկա վտանգները կանխելու համար, և իմ կարծիքով՝ գալիք ընտրությունները կրկին կեղծվելու են»,- «Արմնյուզ» հեռուստաընկերության «Բանաձև» հաղորդման եթերում ասել է նախագահի թեկնածու Արման Մելիքյանը: Նա նշել է, որ ինքնաբացարկը հնարավոր տարբերակներից մեկն էր, սակայն՝ ոչ ամենաարդյունավետը: Ինքը դիմեց ամենաարդյունավետ տարբերակին. իշխանություններին երկխոսության կոչ էր արել և չցանկացավ կեսից կանգնել. «Մենք դուռը բաց էինք թողել, և այն թակող չեղավ»: Արման Մելիքյանն ասել է, որ ինքը դեռ կասի համակիրներին, թե ինչպես քվեարկել, իսկ ինքն անձամբ ընտրությանը չի մասնակցի, քանի որ ըստ իրեն՝ օրինական չէ:
«Որպեսզի մարդ ընտրվի նախագահ, պետք է ապահովվի օրինականություն: Ես ուզում եմ ընտրվել նախագահ, որպեսզի օրինականություն հաստատեմ»,- ասել է նա: Իսկ թե ինչու չի իրականացրել քարոզարշավ, պատասխանել է, որ հեռուստաեթերով ավելի շատ ընտրողների հետ շփվելու հնարավորություն ունի: Բացի այդ, ըստ նրա, անիմաստ է խոսել ծրագրերի մասին, երբ ընտրությունները կեղծվելու են:
Արման Մելիքյանը չի հավատում նաև միասնական թեկնածուի հնարավորությանը, քանի որ, ըստ նրա, Պարույր Հայրիկյանը, Րաֆֆի Հովհաննիսյանն ու Հրանտ Բագրատյանը գաղափարապես տարբեր մարդիկ են, յուրաքանչյուրն ունի առանձին քաղաքական գիծ:
Նախագահի այս թեկնածուն չի հավատում նաև սոցիոլոգիական հարցումներին և համարում է, որ այդ դաշտն էլ մենաշնորհել է Ահարոն Ադիբեկյանը:
Արման Մելիքյանը համաձայն չէ, թե կորցրեց 8 միլիոն դրամ ընտրագրավը, և բացի այդ՝ կորցնի էլ՝ հոգ չէ, քանի որ սա ոչ թե գումարի, այլ սկզբունքների հարց է. «Իմ աջակիցները, որ հավաքել և օգնել են ընդհանուր գործին, ափսոսելու բան չունեն: Այն, ինչ չկարողացան անել այս ժամանակ, հուսով եմ՝ կանեն փետրվարի 18-ից հետո: Քվեարկությանը չեմ մասնակցի, որովհետև կարծոմ եմ, որ օրինական չեն»:
Արման Մելիքյանի խոսքերով՝ Հայաստանում ընտրողների վրա ճնշում է գործադրվում:
