Microsoft կորպորացիան թողարկել է Office Lens կոչվող սքաներ-հավելվածը iPhone-ների համար, հայտնում է hitech.vesti.ru-ն: Հավելվածը շատ արագ տեքստի լուսանկարը վերածում է փաստաթղթի, որը հնարավոր է խմբագրել:
Միաժամանակ, Office Lens-ի համար կարևոր չէ ՝ որքանով ուղիղ է դրված սքանավորվող էջը լուսանկարից. ծրագիրը կարողանում է ուղղել ավտոմատ կերպով սմարթֆոնով անփույթ նկարելու դեպքում բնորոշ երկրաչափական աղավաղումները, բարձրացնել նկարի ցայտունությունը և ազատվել ստվերներից: Ծրագիրն աշխատում է ոչ միայն գրասենյակային փաստաթղթերի, այլև կտրոնների հետ: Լուսանկարված այցեքարտերը ևս ճանաչվում են, իսկ դրանց տեղեկությունը կարող է հեշտությամբ ավելացվել սմարթֆոնի հասցեագրքում:
Սմարթֆոնով «սքանավորված» փաստաթղթերը կարելի է, ճանաչելով, վերածել Microsoft Word ֆայլերի կամ պահպանել PDF ձևաչափով: Կա նաև OneNote-ի հետ ինտեգրում, կարելի է նաև պարզապես OfficeLens բարելավված լուսանկարները պահել սմարթֆոնի ֆոտոպահեստում:
Microsoft Office Lens-ի iOS-ի համար տարբերակը կարող են App Store-ից ներբեռնել բոլոր ցանկացողները, իսկ Android-ի համար նախնական տարբերակը հասանելի է բաց թեստավորման մասնակցիների համար: Այն ներբեռնելու համար անհրաժեշտ է մտնել Google+ խումբ:
