«Հռոմի Պապը շատ դրական երևույթ է ինձ համար: Նախևառաջ՝ աբողջ աշխարհը ցնցեց նրա հրաժարականի լուրը, շատ անսպասելի էր, նույնիսկ՝ Վատիկանում: Սակայն նա գիտակից է և ասել էր մի քանի անգամ, որ այն օրը, երբ հասկանա, որ ֆիզիկապես և հոգեպես չպետք է կառավարի եկեղեցին, կհեռանա»,- անդրադառնալով Հռոմի Պապ Բենեդիկտոս 16-րդ-ի՝ իր հրաժարականի մասին հայտարարությանն՝ «Արմնյուզ» հեռուստաընկերության «Բանաձև» հաղորդման եթերում ասել է Հայաստանում, Վրաստանում Ռուսաստանում և Արևելյան Եվրոպայում հայ կաթողիկե եկեղեցու առաջնորդ Ռաֆայել արքեպիսկոպոս Մինասյանը:
Բենեդիկտոս 16-ի շուրջ եղան մի քանի սկանդալներ՝ ֆինանսական չարաշահումների, մանկապղծությունը չպատժելու և այլնի վերաբերյալ, ինչին Վատիկանն այդպես էլ չէր արձագանքում: Հարցին, թե կարո՞ղ է սրանք նպաստած լինեն Պապի որոշմանը, արքեպիսկոպոսը կտրուկ բացասական պատասխան է տվել: «Եկեղեցին, եթե նայենք որպես մայր, պետք է նայի իր զավակներին: Եթե ընտանիքիում հիվանդ զավակ կա, բուժում են, չեն սպանում: Եկեղեցու մեջ կան սկանդալներ, որին ենթակա է յուրաքանչյուր մարդկային էություն, բայց սխալը չի ծրագրվում եկեղեցու կողմից: Եկեղեցին գտնում է, բայց չի սպանում: Այսինքն, այդ բաները, որ կատարվում են, պետք եկած դարմանն է տալիս եկեղեցին, սակայն թերթերում հրապարակված այդ բոլորը չեն համապատասխանում լրիվ ճշմարտությանը»,- ասել է Ռաֆայել արքեպիսկոպոս Մինասյանը և հավելել, որ սկանդալն այն է, որ պղծվեց քահանայապետի սենյակը՝ ձեռք բերելու համար այնպիսի գրություն, որը տրված էր նրան՝ քննելու համար: Սակայն եթե գրությունը նրա սեղանի վրա է, չի նշանակում, թե իրենն է. «Այ այս սկանդալն է. որ սենեկապետը հանձնեց գրություն, որ տրված է իրեն քննել, իսկ մամուլը հրապարակեց, որ նրա ձեռքի գործն է»:
Հաղորդավարի դիտարկմանը, թե Վատիկանում կան խնդիրներ, Ռաֆայել արքեպիսկոպոս Մինասյանն արձագանքել է, որ սատանան հետ չի քաշվում, մարդիկ միշտ կխոսեն եկեղեցու դեմ, անհատները կարող են սխալվել, բայց եկեղեցին պետք է լինի անսխալական:
Արքեպիսկոպոսն ասել է, որ Պապը չի փոշմանի որոշման համար, որը նրա անձնական որոշումն է, իսկ եկեղեցու բոլոր՝ 122 կարդինալները, կընտրեն նոր Պապի, ում տարիքը 80–ից բարձր պետք է չլինի:
Համեմատելով Հովհաննես Պողոս և Բենեդիկտոս Պապերին՝ արքեպիսկոպոսը նշել է, որ Աստված տալիս է հարմար անձը հարմար ժամանակին. «Հովհաննես Պողոս քահանայապետը ժողովրդի մարդն էր, ողջ աշխարհը բերեց դեպի եկեղեցին: Այս քահանայապետը՝ որպես ուսուցիչ, գիտական, աստվածաբան, կարգի բերեց, ամրապնդեց Վատիկանի գրասենյակները»: Կաթոլիկ հանրությունը, Ռաֆայել արքեպիսկոպոս Մինասյանի խոսքերով, տխուր է, բայց ոչ՝ հիասթափված:
