Վրաստանի խորհրդարանական մեծամասնությունը առաջարկում է երկրի արտաքին քաղաքականության ուղղվածության 14 կետ: Կոմիտեի նախագահ Թեդո Ջափարիձեն աշխատանքային նախագիծն արդեն ուղարկել է բոլոր խմբակցություններին, այդ թվում՝ փոքրամասնությանը: Փաստաթուղթը կոչվում է «Խորհրդարանական խմբակցությունների համաձայնագիր՝ Վրաստանի արտաքին քաղաքականության ուղղվածության վերաբերյալ»,- հաղորդում է «Գրուզիա Օնլայն»-ը:
Նախագծի համաձայն՝ խմբակցությունները հաստատում են համաձայնագրի 14 կետ: Ստորև ներկայացնում ենք դրանք.
– Վրաստանի արտաքին քաղաքականությունը պետք է հիմնվի ազգային շահերի և միջազգային պարտականությունների հավասարակշռության սկզբունքի վրա:
-Պետական կառավարման համակարգի հիմնական խնդիրն է պաշտպանել Վրաստանի ինքնիշխանությունը և տարածքային ամբողջականությունը միջազգայնորեն ճանաչված սահմաններում:
-Վրաստանի արտաքին քաղաքականության առաջնային նպատակն է ինտեգրվել եվրոպական և եվրատլանտյան կառույցներին, անդամակցել ԵՄ-ին և ՆԱՏՕ-ին: Այս ռազմավարական ուղղության հաջող կատարման պայման է ժողովրդավարական արժեքների և միջազգային իրավունքի սկզբունքների անվերապահ արմատավորումը:
-Վրաստանն ամբողջությամբ կիսում է իր պարտականությունները այն մարտահրավերների դեմ պայքարում, որոնք առջև կանգնած է աշխարհը: Այդ միջազգային ջանքերին մասնակցությունը, մասնավորապես ռազմական գործողություններում, պետք է դիտարկվի որպես ազգային շահերի պաշտպանության կարևոր բաղադրիչներից մեկը:
-Ժողովրդավարական ինստիտուտների ուժեղացումը կնպաստի արտաքին տնտեսական հարաբերությունների զարգացմանը և արտասահմանյան ներդրումների հոսքին, ինչպես նաև կչեզոքացնի ներքին քաղաքականության լարվածությունը և կնպաստի հակամարտությունների կարգավորման գործընթացի հաջողությանը:
-Կարճ ժամանակներում պետք է ապահովել այն բոլոր պայմանների կատարումը, որոնք Վրաստանին թույլ են տալիս բարեհաջող կերպով ավարտել ասոցացման մասին բանակցությունները Եվրոխմբի հետ, զարգացնել հարաբերությունները «Հարևանության եվրոպական քաղաքականության» և «Արևելյան համագործակցության» շրջանակներում չորս հիմնական ուղղություններով՝ ժողովրդավարություն և մարդու իրավունքներ, տնտեսական ինտեգրում, մոտեցում ԵՄ օրենսդրությանը, շրջակա միջավայրի և էներգոանվտանգության պահպանություն, մարդկանց միջև հարաբերություններ:
-Վրաստանի քաղաքականությունը չպետք է ուղղված լինի ռազմավարական խաղացողի դերակատարմանը համաշխարհային և տարածաշրջանային հակամարտության գործընթացներւոմ: Վրաստանը քաղաքական առումով պետք է գրավիչ լինի իր խաղաղասեր բնույթով:
-Վրաստանը ԱՄՆ-ի՝ որպես գլխավոր դաշնակցի հետ հարաբերությունները վարելու է ռազմավարական գործընկերության կանոնադրության համաձայն:
-Վրաստանի շահերից է բխում, որպեսզի երկիրը չլինի Արևմուտքի և Ռուսաստանի միջև հակասական հարցերի ցուցակում: Վրաստանը պետք է պատրաստ լինի միջազգային մեխանիզմների կիրառմամբ երկխոսություն սկսել Ռուսաստանի հետ, որի նպատակն է մշակել փուլային ռազմավարություն՝ գոյություն ունեցող ճգնաժամը հաղթահարելու, երկիրը շրջափակումից հանելու և ինքնիշխանությունը պաշտպանելու համար:
-Հյուսիսային Կովկասի ժողովուրդների հետ հարաբերությունների զարգացումը հիմնված է լինելու բարիդրացիական հարաբերությունների, փորձի և մշակութային սերտ համագործակցության ավանդույթների վրա, որոնք չպետք է կիրառվեն Ռուսաստանի հետ հակամարտությունը խորացնելու համար:
-Վրաստանը հավասարակշռված տարածաշրջանային քաղաքականությամբ պետք է ձեռք բերի միավորման, տնտեսական համագործակցության և քաղաքական բանակցությունների գործառույթ: Կարևոր է խորացնել տնտեսական և քաղաքական հարաբերությունները հարևան երկրների՝ Հայաստանի, Ադրբեջանի և Թուրքիայի հետ: Այս երկրների համար Վրաստանը պետք է դառնա հարթակ քաղաքական, տնտեսական, հասարակական և բիզնես հարաբերությունների իրագործման համար:
-Հաշվի առնելով բարենպաստ աշխարհագրական դիրքը տրանսազգային նախագծերի համար՝ Վրաստանի արտաքին քաղաքականության առաջնային ուղղվածություններից մեկը տնտեսական հարաբերությունների լավացումն է Կասպյան տարածաշրջանի և Կենտրոնական Ասիայի երկրների հետ:
-Վրաստանն էականորեն պետք է ակտիվացնի դիվանագիտական հարաբերությունները ՄԱԿ-ում, ԵԽԽՎ-ում և Եվրոպայի այլ ներկայացուցչական կազմակերպություններում, Սևծովյան տնտեսական համագործակցության կազմակերպությունում:
-Միջազգային բեմահարթակում Վրաստանի առջև կանգնած խնդիրները լուծելու համար անհրաժետ է օգտագործել բոլոր սերունդների լավագույն դիվանագետներին: Դրա հետ մեկտեղ առավելագույն կերպով կիրառվելու են երկրի ակադեմիական և փորձագիտական ռեսուրսները, ստեղծվելու է որակավորված դիվանագետների պատրաստման համակարգ:
