Ինչպես հաղորդում է France Presse գործակալությունը, Սիրիայում հանգստյան օրերին կրկին արյունալի բախումներ են գրանցվել: Դարա’ա քաղաքում, որը համարվում է հակակառավարական դիմադրության գլխավոր կենտրոնը, իրավապահների և ցուցարարների միջև բախումների հետևանքով կա 26 զոհ:
Բախումները սկսվել են այն բանից հետո, երբ շաբաթ օրը տեղի են ունեցել ուրբաթօրյա աղոթքից հետո ցույցի դուրս եկած ու սպանված 27 ցուցարարների հուղարկավորության արարողությունը: Դարա’այի հազարավոր քաղաքացիներ դուրս են եկել փողոց` կրկին պահանջելով երկրի իշխանության հրաժարականը:
Իրավապաշտպանները նաև հաղորդել են, որ հանգստայն օրերին երկրի Արևմուտքում գտնվող Հոմս քաղաքում սպանվել է 2 մարդ: Համատարած իրականացվում են ընդդիմադիրների ձերբակալություններ: Euronews-և հաղորդում է, որ ծանր զինտեխնիկա է մտցվել երկրի հյուսիս-արևմուտքում գտնվող Լաթաքիա քաղաք, որտեղ նույնպես պարբերաբար տեղի են ունենում բախումներ և հակակառավարական բողոքի ակցիաներ:
Հիշեցնենք, որ մարտի 18-ից սկսված բախումների հետևանքով Սիրիայում զոհվել է ավելի քան 200 մարդ: Երկրում քաղաքական և տնտեսական բարեփոխումներ պահանջող ցուցարարներին ընդառաջ գնալով՝ Սիրիայի նախագահ Բաշար Ալ-Ասադը հայտարարեց մի շարք բարեփոխումների իրականացման մասին, սակայն դրանց համար ժամկետներ չեն նշվել, ինչն էլ հարուցում է երկրի բնակչության դժգոհությունը` հրահրելով նոր բախումներ:
