«Արգո» օպերացիան» շարունակել է հաղթարշավը՝ ստանալով Կինոյի ու հեռուստաարվեստի բրիտանական ակադեմիայի՝ BAFTA-ի 3 մրցանակներ, ներառյալ մրցանակ «Լավագույն ֆիլմ» անվանակարգում: Այս մասին հայտնում է BBC-ի ռուսական ծառայությունը:
Բեն Աֆլեքը, որի այս ֆիլմը պատմում է Իրանում ամերիկացի պատանդների մասին, ճանաչվել է «Տարվա լավագույն ռեժիսոր»: Հունվարին ֆիլմը «Ոսկե գլոբուս» էր ստացել:
Լավագույն դերասան է ճանաճվել Դենիել Դեյ-Լյուիսը՝ Սթիվեն Սփիլբերգի «Լինքոլն» կենսագրական ֆիլմում դերակատարման համար: Շատերի համար անսպասելիորեն «Կնոջ լավագույն դերակատար» է ճանաչվել ֆրանսիացի դերասանուհի Էմանուել Ռիվան՝ Միխայել Հանեկեի «Սերը» ֆիլմում:
«Երկրորդ պլանի լավագույն դերասանուհի» է ճանաչվել Էնն Հեթեուեյը «Թշվառները» մյուզիքլում դերի համար:
«Երկրորդ պլանի տղամարդու լավագույն դերակատար» է ճանաչվել, ըստ BAFTA-ի ժյուրիի, Քրիստոֆ Վալցը Քվենտին Տարանտինոյի «Ազատագրված Ջանգոն» ֆիլմում։
Էնգ Լիի «Պիի կյանքը» ֆիլմը մրցանակի է արժանացել օպերատորական աշխատանքի ու հատուկ էֆեկտների համար:
Ռեժիսոր Ալան Փարքերը ստացել է BAFTA-ի պատվավոր մրցանակը, որն անցած տարի շնորհվել էր Մարտին Սկորսեզեին:
Կինեմատոգրաֆում զգալի ավանդի համար ևս մեկ մրցանակի է արժանացել Տեսա Ռոսը՝ բրիտանական Channel Four ղեկավարներից մեկը:
