Եգիպտոսի նախկին նախագահ Հոսնի Մուբարաքը նախօրեին հայտնվել է հեռուստաեթերում` անվանելով իրեն զրպարտության զոհ: Նրա ելույթն առաջինը հեռարձակվել է Al-Arabia հեռուստաալիքով:
Մուբարաքը նշել է, որ լքել է իր պաշտոնը, որովհետև ամեն ինչից վեր է դասել երկրի և ժողովրդի շահերը: Նշելով, որ հաշվեհամարներ և ունեցվածք չունի արտասահմանում` Մուբարաքը պատրաստակամություն է հայտնել համագործակցելու Եգիպտոսի իշխանությունների հետ: Միակ հաշվեհամարը, որ նա ունի, գտնվում է եգիպտական բանկերից մեկում:
Մուբարաքը նշել է, որ ինքն ամբողջ կյանքի ընթացքում անկեղծ ծառայել է իր երկրին, և որ ինքը պատրաստվում է դատական հայցեր ներկայացնել բոլոր նրանց դեմ, ովքեր բացասական տեղեկատվություն են տարածել իր մասին ինչպես Եգիպտոսում, այնպես էլ նրա սահմաններից դուրս:
Նա ավելացրել է, թե քննությունը ցույց կտա, որ իր որդիների հաշվեհամարները ձեռք չեն բերվել իշխանության չարաշահման արդյունքում:
Հիշեցնենք, որ 18 օր տևած բախումներից հետո Եգիպտոսի նախագահ Հոսնի Մուբարաքը հրաժարական էր տվել` իշխանությունը փոխանցելով Բարձրագուն զինվորական խորհրդին: Այս պահին նրա և նրա ընտանիքի անդամների դեմ հարուցված են քրեական գործեր: Մուբարաքները չեն կարող լքել երկիրը, քանի դեռ չի ավարտվել նախաքննությունը:
