«Սաբահ» թուրքական թերթը հրապարակել է պաղեստինյան արաբների առաջնորդ Յասեր Արաֆաթի կնոջ` Սուխա Արաֆաթի հետ հարցազրույցը:
Թերթի թղթակցի հետ Մալթայում զրույցի ժամանակ Սուխան հիշել է, թե ինչպես 1995 թ. ամռանը Ֆրանսիայում կեսարյան հատման ճանապարհով լույս աշխարհ եկավ «փոքրիկ Զահվան» (ընդամենը 2,4 կգ քաշով): Նա պատմել է այն մասին, որ ամուսինը` քաղաքականությամբ տարված, իր և դստեր համար գրեթե ժամանակ չի ունեցել:
Ըստ նրա՝ մեկ անգամ չէ, որ ինքը զղջացել է Արաֆաթի հետ ամուսնանալու համար: Նա նշել է, որ բազմիցս ցանկացել է ամուսնալուծվել, սակայն Արաֆաթը մերժել է:
Կինը նշել է, որ ամուսնությունից հետո տեղափոխվել է Պաղեստինյան Ինքնավարություն, որտեղ նրան հետապնդել են սուտ բամբասանքները: Իսկ Յասերի մահից հետո, այրու խոսքերով, ինքը հայտնվել է «ձկներով լի լողավազանում». իրեն հետապնդել են և՛ Թունիսի իշխանությունները, և՛ պաղեստինյան նոր վարչակարգը, և բոլորն «Արաֆաթի միլիոններն են փնտրել», որոնց հետ կինը որևէ առնչություն չի ունեցել:
Սուխա Տաուլը Սուխա Արաֆաթ դարձել է 90-ականներին: 1995 թ. ծնվել է նրանց դուստրը: 2003 թ. մարտին Forbes ամսագիրը տեղեկություններ էր հրապարակել «թագավորների, թագուհիների և բռնակալների» եկամուտների մասին: Այդտեղ Արաֆաթի անձնական ունեցվածքը գնահատվել էր 300 մլն դոլար: Այդ նույն ամսագիրը հրապարակել էր «Արաֆաթի աուդիտը» հոդվածը, որտեղ նշվում էր, որ իրականում «ռաիսն» (առաջնորդը) ունի ավելի քան մեկ մլրդ դոլար: «Արաֆաթի միլիոնները» Սուխա Արաֆաթի հետ պաղեստինյան նոր վարչակարգի բախումների պատճառ են հանդիսացել: Պաղեստինյան առաջնորդ Մահմուդ Աբբասը պահանջում էր «կուսակցական դրամագլխի» վերադարձ, սակայն Սուխան պնդում էր, որ ՖԱԹՀ-ի որևէ գումար չի յուրացրել: Հարցազրույցներից մեկում նա նշել էր, որ ապրում է ընդամենը ամսական 10 հազար դոլարով` դժվարությամբ ծայրը ծայրին հասցնելով:
ԶԼՄ-ները հրապարակել են Յասերի մահից հետո Եվրոպայում և Թունիսում Սուխայի ներդրումային կորուստների մասին: Թե ինչպիսի ֆինանսական վիճակում է առաջնորդի այրին, ոչ ոք չգիտի:
Անցյալ տարվա աշնանը Սուխա Արաֆաթը հասավ նրան, որ ամուսնու արտաշիրիմում իրականացվի` ռադիոմետրային ուսումնասիրության մպատակով: Նա կասկածներ ուներ, որ ամուսնուն սպանել են ռադիոակտիվ նյութերով թունավորմամբ:
