Չեմ հասկանում Պարույր Հայրիկյանի հայտարարությունը բովանդակային և իրավական գործընթացների տեսանկյունից: Այս մասին «Առաջին լրատվական»-ի հետ զրույցում ասաց ՀՀ ԱԺ էթիկայի հանձնաժողովի նախագահ, ԵԽԽՎ հայաստանյան պատվիրակության ղեկավար Դավիթ Հարությունյանը՝ անդրադառնալով ՀՀ նախագահի թեկնածու, ԱԻՄ առաջնորդ Պարույր Հայրիկյանի հայտարարությանը, թե ՍԴ ներկայացրած իր դիմումը հետ կվերցնի, եթե ՀՀ նախագահի թեկնածուներ Րաֆֆի Հովհաննիսյանի, իր և Հրանտ Բագրատյանի միջև համախմբում տեղի ունենա:
«Ենթադրենք, թե Պարույր Հայրիկյանը հետ է վերցնում իր դիմումը: Այս փուլում որևէ թեկնածու այլևս չի կարող հայտարարել, որ իր ձայները պետք է գնան մեկ այլ թեկնածուի, որովհետև ժամկետը, որի ընթացքում թեկնածուն կարող էր ինքնաբացարկ հայտնել, ավարտվել է: Այնպես որ ես իսկապես լավ չեմ հասկանում, թե ինչ է նշանակում Պարույր Հայրիկյանի հայտարարությունը բովանդակային առումով և իրավական գործընթացների առումով: Այդ պատճառով դժվարանում եմ պատասխանել այլ հարցերի»,- ասաց Դավիթ Հարությունյանը:
Հիշեցնենք, որ ՀՀ նախագահի թեկնածու Պարույր Հայրիկյանը նախօրեին հրապարակային կոչով դիմել էր ՀՀ նախագահի երկու թեկնածուների՝ միավորվել մեկ թեկնածուի շուրջ: Իսկ այսօր ՍԴ դիմում ներկայացնելիս լրագրողների հետ հանդիպման ժամանակ հստակեցրել էր, թե որ դեպքում հետ կվերցնի իր դիմումը: Ըստ նրա՝ այն դեպքում, եթե լինի միասնական թեկնածու:
