Սիրիահայ գործարար Հրաչ Բալ-Մանուկյանը մեկ տարի առաջ է Սիրիայից տեղափոխվել Երևան, զբաղվում է տեքստիլ ապրանքների արտադրությամբ, հիմա, սակայն, գործարանը կանգնած է փակման վտանգի առաջ:
«Առաջին լրատվական»-ի հետ զրույցում նա նշեց, որ իրենց հիմնական խնդիրը տնտեսական է. «Մենք մինչև դեկտեմբերի սկիզբը լավ աշխատում էինք, վատ չէր, բայց դոլարի կուրսի տատանումը (դրամի արժեզրկումից անցել է չորս ամիս) մենք դեռ չենք մարսել: Մենք՝ որպես սիրիացի, մեր տունը վարձակալել ենք, արտադրամասը՝ նույնպես, նաև ապրանքը. գումարը քով քովի դրեք և տեսեք՝ ուր է հասնում: Մենք մինչև այսօր բանկի հետ խնդիրներ չենք ունեցել, բայց եթե այսպես շարունակվի, մենք հաստատ խնդիրներ կունենանք»,- ասաց նա՝ հավելելով, որ այսօր սիրիահայ մի խումբ գործարարներով պատրաստվում են դիմել կառավարությանը՝ խնդրելով որոշ ժամանակով սառեցնել իրենց վարկային պարտավորությունները:
Այս խնդրով սիրիահայը դիմել է Փոքր և միջին ձեռնարկատիրության զարգացման ազգային կենտրոնի տնօրեն Գեղամ Պետրոսյանին, բայց ապարդյուն:
Նրա խոսքով՝ այս չորս ամիսներին կորուստները շատ են արտադրամասում, որտեղ 28 հոգի էին աշխատում, ուստի ստիպված նրանց ուղարկել են հարկադիր պարապուրդի:
«Ստիպված ենք մարդկանց տուն ուղարկել, քանի որ մի շարք ծախսեր ունենք: Գործի սիստեմը փոխել ենք, ավելի փոքրացրել ենք: Մենք մինչև այսօր բանկի հետ խնդիր չենք ունեցել, բայց արդեն կունենանք»,- հավելեց նա:
Ավելին՝ տեսանյութում:
