Ֆրանսիան, Գերմանիան և Իտալիան Մեծ Բրիտանիայից հետո կմիանան Asian Infrastructure Investment Bank-ին, գրում է The Financial Times-ը՝ հղում անելով եվրոպացի պաշտոնյաներին: Ավելի վաղ հաղորդվում էր, որ Չինաստանն ուզում է գլոբալ ֆինանսական ինստիտուտ ստեղծել՝ ունակ մրցելու Համաշախարհային բանկի և Ասիական զարգացման բանկի հետ, քանի որ մտավախություն ունի, որ ԱՄՆ-ը և նրա դաշնակիցները չափազանց մեծ ազդեցություն ունեն: Հաղորդվում էր նաև, որ ԱՄՆ-ը Մեծ բրիտանիային քննադատել է AIIB-ին միանալու որոշման համար:
Պարբերականը նշում է, որ Ֆրանսիայի, Գերմանիայի և Իտալիայի որոշումը հարված է արևմտյան երկրներին այդ նոր ինստիտուտից դուրս պահելու ամերիկյան փորձերին: Նույնպիսի ճնշում Վաշինգտոնը գործադրել է Ավստրալիայի վրա, որն ԱՄՆ-ի կենտրոնական դաշնակիցն է Ասիա-Խաղաղօվկիանոսյան տարածաշրջանում, սակայն հիմա Կանբերան հայտարարում է այդ հարցի շուրջ իր դիրքորոշումը վերանայելու ծրագրերի մասին, ասվում է հոդվածում:
Բացի դրանից՝ թերթը, վկայակոչելով հարավկորեական ԶԼՄ-ներին, գրում է, որ Սեուլը ևս կարող է վերանայել AIIB-ին չմիանալու իր որոշումը:
