Մարտի 14-ի երեկոյան Ստամբուլում բացվելու է «Սպեկտրոգրաֆիա. ուրվականնների հետքերով» ցուցահանդեսը, որի ժամանակ ներկայացվելու է Հայոց ցեղասպանության տարիներին քրդի կողմից առևանգված, բռնի իսլամացված, ապա նաև փախուստի միջոցով փրկված Գյուլիզարի պատմությունը, փոխանցում է «Ակօս» շաբաթաթերթը:
Ստամբուլի «Դեպո» սրահում կայանալիք ցուցադրության ժամանակ ներկայացվելու է նաև «Ցտեսությունը շատ գեղեցիկ է» բեմադրությունը, որը նվիրված է Ցեղասպանությունը վերապրած հայուհու կյանքին: Բեմադրության տեսագրությունը հետագա օրերին ևս հասանելի է լինելու ցուցադրությունն այցելած անձանց:
Ցուցահանդեսին մասնակցելու է Գյուլիզարի թոռնուհին` Մելինե Տեր-Մինասյանը: Իրենց աշխատանքները ներկայացնելու են նաև Աննա Բարսեղյանը, Ստեֆան Կրիստենսենը, Ուրիել Օրլոուն: Մելինե Տեր-Մինասյանի և Աննա Բարսեղյանի մասնակցությամբ էլ կայանալու է «Ցտեսությունը շատ գեղեցիկ է» բեմադրությունը:
Բացի այդ, ցուցադրության ընթացքում ներկայացվելու է Գյուլիզարի դստեր` Արմենուհի Կևոնյանի` «Գյուլիզարի սև ամուսնությունը» գիրքը: Գրքում ներկայացված է հայ կնոջ կյանքի դաժան պատմությունը, նրա հերոսական փրկությունը: Գիրքը թուրքերենով հրատարակել է Ստամբուլում գործող հայկական «Այաս» հրատարակչատունը:
