Ոստիկանությունը երեկ հրապարակեց ԱԱԾ վարույթում քննվող Երրորդմասցի Լյովիկի և ընկերների սպանության, ինչպես նաև ապօրինի զենք զինամթերք պահելու մեջ մեղադրվող 29-ամյա Սարգիս Գրիգորյանի (Ծգլ), 31-ամյա Սարգիս Հախանումյանի (Տլե) և նրա հասակակից Վահան Հակոբյանի (Գաստիկ) վերաբերյալ տվյալներ:
Հաշվի առնելով այն հանգամանքը, որ սպանության գլխավոր կասկածյալների անուններն արդեն պաշտոնապես հրապարակված են և նրանց նկատմամբ արդեն իսկ հետախուզում է հայտարարված, հրապարակենք դեպքի վերաբերյալ yerkir.am-ին հայտնի ուշագրավ մանրամասներ:
Նախ ուշադրություն հրավիրենք Գաստիկի լուսանկարին , որտեղ ակնհայտ երևում է վերջինիս ծնոտիին առկա մեծ սպին:
Yerkir.am-ի աղբյուրները հուշել են, որ Գաստիկի մարմնի տարբեր հատվածերում նմանատիպ շատ սպիներ կան, որոնք դառը պատմություն ունեն և անմիջականորեն կապված են կատարված հանցանքի ենթադրյալ շարժառիթների հետ: Համաձայն արդեն տևական ժամանակ շրջանառվող լուրերի` Գաստիկը երրորդմասցի Լյովիկի հետ ժամանակին լուրջ կոնֆլիկտ է ունեցել: Իսկ բուն կոնֆլիկտի էությունը, ինչպես տեղեկացրեցին մեզ, եղել է այն, որ Գաստիկը՝ Վահան Հակոբյանը լինելով շենգավիթցի, չի ընդունել Լյովիկի պայմանը՝ լինել իր թիմի անդամ: Պատմությունը, ասում են, սկսվել է դեռ 2000-ականների կեսերից, երբ երրորդմասցի Լյովիկը Շենգավիթում սկսում է իր շուրջը հավաքել հանցագործ աշխարհին նվիրված և «ակտիվությամբ» աչքի ընկնող երիտասարդներին: Հենց այս ժամանակ էլ խաչվում են երկու երիտասարդների ճանապարհները:
Պատմում են, որ Լյովիկը չի կարողանում «կուլ տալ» այն, որ Շենգավիթում կա մեկը, ով մերժել է իր առաջարկությունը և չի ենթարկվում իր «խաղի կանոններին»: Իսկ ինչ վերբերում է թշնամանքի սկզբին, խոսակցություններ կան, որ ամեն ինչ սկսվել է նրանից, որ մեկ տարի առաջ Գաստիկն առևանգել է Լյովիկի մերձավորներից մեկին, դաժան ծեծի ենթարկել, անգամ գցել նրան շան բունը: Լյովիկը որոշում է պատժել Գաստիկին` իր մարդկանց կողմից նրան դաժանաբար ծեծի ենթարկելով:
Շենգավիթցիները պատմում են, որ Գաստիկին հանկարծակի են բերել, մեն մենակ բռնելով: Ամեն ինչ տեղի է ունեցել կայծակնային արագությամբ: Ծեծել են, մեքենան վարել նրա ոտքերի վրայով և մտածելով թե մահացել է, հեռացել են: Գաստիկին մահամերձ վիճակում հիվանդանոց է տեղափոխվել և մի քանի անգամ վիրահատությունների ենթարկվելուց հետո, հրաշքով ողջ է մնացել:
Տարբեր աղբյուրների վկայությամբ, Գաստիկի ձեռքերի հատվածում 28 կար կա, իսկ գլխքին և դեմքին` 38: Նույն աղբյուրների համաձայն` Գաստիկը մեսիջներով հասկացրել է Լյովիկին և նրա շրջապատին, որ վրեժն անխուսափելի է լինելու: Իսկ այն, որ ծեծվելուց հետո Գաստիկը միառժամանակ բացակայել է հանրապետությունից, փաստ է: Այդ մասին yerkir.am-ը դեռևս դեպքին հաջորդող օրերին էր հրապարակել: Թեև Լյովիկն ու իր շրջապատը տեղյակ են եղել Գաստիկի բացակայությունից, սակայն պահել են զգոնությունն ու զգուշավորությունը:
Հիշեցնենք, որ ըստ մամուլի հրապարակումների` Լյովիկն իր ընկերների հետ «Նուբարաշեն» ՔԿՀ է գնացել «մինչև ատամները զինված: Մասնավորապես Լևոն Ղազարյանին պատկանող «Լեքսուս 470» ավտոմեքենայից իրավապահները մեծ քանակությամբ զենք-զինամթերք են հայտնաբերել:
Ասում են, որ Գաստիկն այնքան վտանգավոր մեսիջներ է հղել, որ Լյովիկի շրջապատում անգամ մտավախություն են ունեցել, որ Գաստիկն հնարավոր է Լյովիկի դեմ հայտնվի և վրեժ լուծի նունիսկ ինչ-որ առիթի՝ ծնունդի, կնունքի կամ հարսանիքի ժամանակ: Բանը նրանում է , որ այս մասին շատերն են իմացել, նաև իրավապահները: Շրջանառվող, իսկ այժմ արդեն հաստատված լուրերի համաձայն, ` Գաստիկի և Լյովիկի խնդրի մասին տեղյակ են եղել նաև շատ բարձրաստիճան պաշտոնյաներ: Լյովիկի քրեական անցուդարձի մասին լավատեղյակ են եղել նաև ոստիկանները:
Նկատենք, որ Գաստիկը միակ անձը չէ, ում հետ Լյովիկը խնդիրներ է ունեցել: Հենց սպանության օրը լրատվամիջոցներում մի քանի հրապարակումներ եղան այն անձանց շրջանակի մասին, որոնց հետ Լյովիկը ժամանակին իբր լարված հարաբերություններ է ունեցել: Այդ անունների շարքում շոշափվեց նաև «օրենքով գող» Գևորգ Մելիքյանի` Օշականցի Գևորիկի անունը: Հիշեցնենք, որ նախորդ տարվա մարտին լուրեր տարածվեցին, որ քրեական հեղինակություններ Քանաքեռցի Արթուրը՝ հայտնի Տույ մականվամբ, և Երրորդմասցի Լյովիկը ծեծի էին ենթարկել Օշականցի Գևորիկին: Այս հարցը շատ արագ կարգավորվեց, սակայն ծեծվածի պիտակն այդպես էլ դուրս չեկավ Օշականցի «օրենքով գողի» վրայից: Նրա հետ առնչված տուժողների ցանկը շատ բազմազան է: Այս մասին մենք առաջիկայում կանդրադառնանք, իսկ մինչ այդ , նշենք, որ երրորդմասցի Լյովիկի նկատմամբ մահափորձեր էլի են եղել և հակառակը:
Ի դեպ` Քանաքեռցի Արթուրը ` նույն ինքը Արթուր Ղազարյանը, Լյովիկի և «Օրենքով գող» ներկայացվող Պզոյի` Արմեն Ղազարյանի ազգականն է: Ըստ մամուլի հրապարակումների` դեպքից հետո նա սկսել է շրջել զրահապատ մեքենայով:
Մեզ հասած լուրերի համաձայն` նա տեղյակ է սպանության իրական շարժառիթներից և չնայած Լյովիկն իր եղբորորդին է ` չի բացառվում, որ հարցն այլ կերպ լուծվի: Անդրադառնալով բուն սպանության դեպքին, նշենք, որ մեզ հասած տեղեկություններով` Լյովիկի դիակի վրա հայտնաբերվել են բազմաթիվ փամփուշտներ, ինչն էլ հերթական անգամ վկայում է այն մասին, որ թիրախում եղել է հենց նա:
Ի դեպ` չար լեզուներն ասում են, որ Լյովիկի` «Նուբարաշեն» այցելության մասին տեղեկատվությունը դուրս է եկել «կլոր բերդի» պատերից, իսկ թե ով է հանցագործներին հրամցրել այդ լուրը` կպարզի քննությունը….եթե կամենան:
Մանրամասները` yerkir.am կայքում:
