Վրացական G eorgiatimes.info կայքի հաղորդմամբ, Թուրքիայի արտգործնախարարությունը հայտարարություն է տարածել Աբխազիայի նախագահ Սերգեյ Բաղապշի Թուրքիա կատարած այցի կապակցությամբ.
«Թուրքիան ճանաչում և աջակցում է միջազգայնորեն ճանաչված Վրաստանի տարածքային ամբողջականությունը: Թուրքիան արմատապես հետևում է իր այդ քաղաքականությանը: Թուրքիան վիթխարի նշանակություն է տալիս Վրաստանի հետ ունեցած իր ռազմավարական-գործընկերային հարաբերություններին, որոնք բոլոր ոլորտներում հիմնված են բարեկամության ու լայն համագործակցության վրա:
Պարոն Սերգեյ Բաղապշի այցն իրականացվում է Թուրքիայում հիմնված քաղաքացիական հասարակական կազմակերպությունների հրավերով ու դրանց պատասխանատվությամբ: Բաղապշի այցը չի կրում պաշտոնական բնույթ»:
Հիշեցնենք, որ եթե թուրք բարձրաստիճան պաշտոնյաները համարձակվեին հանդիպումներ ունենալ Բաղապշի հետ, ապա դա մեծ լարվածություն կառաջացներ թուրք-վրացական հարաբերություններում: Չպետք է մոռանալ, որ Թուրքիան էներգետիկ ու հաղորդակցային մեծ կախվածության մեջ է Վրաստանից:
Վերջինս այժմ իրեն համարում է «տարանցիկ մարգարիտ», ինչին հասնել հաջողվել է հայ-ադրբեջանական ու հայ-թուրքական սահմանների փակ լինելու շնորհիվ: Դրա համար էլ Վրաստանն ահով էր հետևում հայ-թուրքական հարաբերությունների կարգավորմանը, քանի որ դրա արդյունքում ակնկալվող հայ-թուրքական սահմանի բացումը Հայաստանին հնարավորություն կընձեռեր ոչ միայն նվազեցնելու Վրաստանից ունեցած իր աշխարհագրական կախվածությունը, այլև` առավել համարձակորեն առաջ քաշելու վիրահայերի խնդիրները:
