Արաբական աշխարհում տեղի ունեցող իրադարձությունները Հայաստանի համար չափազանց կարևոր են` հաշվի առնելով այն հանգամանքը, որ այնտեղ հայկական մեծաթիվ համայնք կա: Լրագրողների հետ հանդիպման ժամանակ նման կարծիք հայտնեց սփյուռքագետ Էդուարդ Մելքոնյանը:
Անդրադառնալով Եգիպտոսի դեպքերին` Մելքոնյանը հիշեցրեց, որ այնտեղ ապրում է մոտ 6 հազար մարդ` հիմնականում Կահիրեում և Ալեքսանդրիայում, որոնք էլ հուզումների ժամանակ չեզոք դիրք բռնեցին և այժմ էլ սպասումի մեջ են:
Սփյուռքագետի գնահատմամբ, ի տարբերություն Եգիպտոսի, Սիրիայում կա մոտ 80 հազար հայ, և նրանք այնտեղ չափազանց կազմակերպված են, ակտիվ և հուզումների հենց առաջին օրվանից ներկայացրել են իրենց գնահատականը: Մելքոնյանը նշեց, որ հայ համայնքը գործող նախագահ Բաշար Ալ-Ասադի կողքին է, քանզի վերջինս ազատություն է տալիս փոքրամասնություններին, մասնավորապես հայերին, և հայերը Սիրիայում լայն իրավունքներ ունեն:
Սակայն, ըստ սփյուռքագետի, Ասադն արդեն սկսել է ռեֆորմներ, որոնք էլ ավելի են ուժեղացնում իսլամի դերը պետության մեջ, իսկ նման ռեֆորմներն ու արմատական փոփոխությունները առաջին հերթին ազդում են հենց փոքրամասնությունների վրա, բայց` ոչ դրական առումով:
