2015թ. սկզբից անվտանգության և պաշտպանության ոլորտներում Ադրբեջանի կորուստները կազմել է 12 զինվոր, որից 8-ը մարտական, 4-ը՝ ոչ մարտական իրավիճակներում: Նման տեղեկություն հրապարակել է Ռազմական հետազոտությունների կասպյան ինստիտուտը` հիմնվելով մեդիայի և սոցիալական ցանցերի մոնիտորինգի վրա:
Զեկույցում մասնավորապես նշվում է, որ 7 զինվոր զոհվել է Հայաստանի հետ բախման հետևանքով, 1-ը՝ պայթել է ականի վրա: Ոչ մարտական իրավիճակներում 4 զոհերից երկուսը մահացել են ոչ կանոնադրային հարաբերությունների, 1-ը՝ զենքի հետ անզգույշ վարվելու հետևանքով, չորրորդը՝ հիվանդությունից:
Բացի այդ, նշված ժամանակահատվածում վիրավորվել է 5 զինվոր, որից 3-ը՝ ռազմական իրավիճակում, մեկը՝ ականի պայթյունից, մյուսը՝ ոչ կանոնադրային հարաբերությունների հետևանքով:
Զեկույցի հեղինակները նշում են, որ նախորդ տարիների համեմատությամբ այս տարի որոշակի դժվարություններ կան բանակի զոհերի մոնիտորինգի հարցում, քանի որ Պաշտպանության նախարարությունը և մյուս ուժային կառույցները շատ դեպքերում նախընտրում են թաքցնել կորուստները, իսկ իշխանություններին հավատարիմ մեդիան հրահանգված է չտարածել մարտական զոհերը:
Ուշագրավ է, որ այս Ինստիտուտը ղեկավարում է ռազմական փորձագետ Յասուր Սումերինլին, որը լքել է Ադրբեջանը իշխանությունների հետապնդումների պատճառով:
Սումերիլին նշում է, որ ադբեջանական արժույթի արժեզրկման պատճառով վատթարացել է նաև զինծառայողների սոցիալական պաշտպանվածությունը: Ըստ նրա՝ պայմանագրային զինծառայողների աշխատավարձն այժմ աննշան է: Այդ գումարը, ըստ նրա, համարժեք չէ երկրի՝ 4 մլրդ դոլար կազմող ռազմական բյուջեին, որի 60-70 տոկոսը, սակայն, ծախսվում է սպառազինության վրա:
Սումերինլիի խոսքով՝ քանի դեռ բանակին համապատասխան սոցիալական պաշտպանություն չի տրվել, բանակում կպահպանվեն ոչ կանոնադրային հարաբերությունները, իսկ սպաների մոտ՝ կարիերային առաջխաղացման հույսի բացակայությունը:
Պատրաստեց՝ Վիկտորյա Անդրեասյանը