Այսօր էլեկտրոնային լրատվամիջոցներից մեկում լուր էր տարածվել, ըստ որի՝ 2011 թ. հունվար-փետրվար ամիսներին 2010 թ. հունվար-փետրվարի համեմատ արտերկրից Հայաստան մտնող մասնավոր տրանսֆերտների ծավալը նվազել է 30%-ով: Երեկ մենք հաղորդել էինք (http://1in.am/arm/armenia_economy_15538.html), որ 2011 թ. հունվար-փետրվարին նախորդ տարվա նույն ժամանակահատվածի համեմատ մասնավոր տրանսֆերտներն աճել են 27.7%-ով:
Վերահաստատում ենք, որ մասնավոր տրանսֆերտները ոչ թե նվազել, այլ աճել են 27.7%-ով: Այդ էլեկտրոնային լրատվամիջոցի տարածած լուրի մեջ 2011 թ. միայն փետրվար ամսվա տրանսֆերտների ծավալը համեմատվել էր 2010 թ. հունվար և փետրվար ամիսների թվերի հետ, այդ պատճառով էլ նվազում էր «ստացվել»:
Բացի այդ` պետք է համեմատել ոչ թե տրանսֆերտների (ՀՀ բանկային համակարգի միջոցով ֆիզիակական անձանց ոչ առևտրային նպատակով կատարված փոխանցումների) ներհոսքերը, այլ ներհոսք հանած արտահոսք (զուտ ներհոսք) ցուցանիշները: Այսինքն` ԿԲ 2011 թ. փետրվար ամսվա տեղեկագրի (http://www.cba.am/Storage/AM/downloads/parberakan/statistics/texekagir/tex_01_11.pdf) 118-րդ էջի վերևի առաջին աղյուսակից պետք է վերցնել չորրորդ սյան թիվը (մոտ 92 մլն դոլար) և համեմատել երկրորդ աղյուսակի յոթերորդ սյան թվի (մոտ 117.5 մլն դոլար) հետ: Ստացվում է 27.7% աճ ((117.5-92)X100%:92=27.7%):
