Լոնդոնի մետրոյի վարչակազմն արգելել է հրեաների մասին ներկայացման գովազդային պաստառները՝ պիեսի վերնագրի պատճառով դրանք համարելով հակասեմիթական, հայտնում է Ria Novosti-ն: Այդ որոշումը վշտացրել է բեմադրության հեղինակներին, որոնք նշում են, որ մետրոյի ղեկավարությունը որոշում է ընդունել՝ չծանոթանալով դրա բովանդակությանը:
Արգելքի պատճառը բեմադրության Bad Jews անվանումն է, որը կարելի է թարգմանել որպես «Վատ հրեաներ» կամ «Անպետք հրեաներ»: Մետրոյի ղեկավարությունը հայտարարել է, որ վախենում է հակասեմիթիզմի տարածումից:
Շոուի պրոդյուսեր Դեննի Մոարը որոշումը որակել է գրաքննչական և հայտարարել, որ պիեսը հակասեմիթական բնույթ չունի:
«Դերասանական կազմի կեսը հրեաներ են, ես հրեա եմ, հեղինակը հրեա է, իսկ «վատ» բառն անվան մեջ, եթե դա նշանակություն ունի, չի նշանակում «չար»: Այն նշանակում է «կրոնական ծեսերը չպահպանող»: Դա գրաքննության ձև է, և փարիզյան Charlie Hebdo ամսագրի խմբագրությունում իրադարձությունների ֆոնին բոլորը պետք է բողոքի դուրս գան այդ հարցով»,- լրագրողներին ասել է Մոարը: Ավելի վաղ պիեսը ստացել է Jewish Chronicle պարբերականի բարձր գնահատականը:
