ԱԺ պատգամավոր Սամվել Ալեքսանյանը, այսօր «Առաջին լրատվական»-ի հետ զրույցում անդրադառնալով իր կողմից արտադրվող օղիներին, որոնց անվանումները խիստ նմանեցված են ուկրաինական հայտնի օղիների անուններին, ասաց, թե այդ օղիները 2010 թ. վերջից արտադրությունից հանվել են։ Հետևաբար այսօր շուկայում վաճառվող օղիները նախորդ տարվա արտադրանքն են, որոնք դեռ ամբողջությամբ չեն իրացվել:
Հիշեցենք, որ ապրիլի 4-ին Ուկրաինայի էկոնոմիկայի փոխնախարար Վալերի Պյատնիցկին, խոսելով Սամվել Ալեքսանյանի կողմից արտադրված օղիների անվանումների մասին, որոնք խիստ նմանեցված են ուկրաինական օղիների անվանումներին և արտաքին տեսքին, ինչը մոլորության աստիճան շփոթեցնում է սպառողներին, հայտարարել է, որ իր երկիրը բանակցում է Առևտրի համաշխարհային կազմակերպության հետ` նկատելով, որ եթե ԱՀԿ-ի միջոցով էլ հարցը չլուծվի, ուկրաինական իշխանությունները այլ միջոցներ կձեռնարկեն:
Ուկրաինացի օղի արտադրողներին հատկապես զայրացրել է պատգամավոր Սամվել Ալեքսանյանին պատկանող «Ալեքս Գրիգ» ընկերության անբարեխիղճ գործելաոճը: Ուկրաինական «Էկոնոմիչեսկի իզվեստիա»-ն ահազանգում է, որ «Ալեքս Գրիգ»-ի արտադրած «Ուկրաինա» օղին անասելի նման է «Ուկրաինկա»-ին, որն արտադրում է ուկրաինական «Ալեֆ-Վինալ» ընկերությունը, «Խլոպվի» օղին հար և նման է ուկրաինական «Խորտիցա»-ին, «Պրեմիումը»` ուկրաինական «Պրայմ»-ին: Մոլորության մեջ է գցում նաև «Խլեբնի դար» անունով օղին:
