Իրանի իշխանությունները գրավի դիմաց ազատ են արձակել Շվեդիայի մի քաղաքացու` Oriflame հայտնի կոսմետիկական ընկերության ներկայացուցչին, որը ձերբակալվել էր 2010թ. օգոստոսին` անվտանգության նկատառումներից ելնելով: Այս մասին փոխանցում է BBC-ն: Նույն աղբյուրի փոխանցմամբ, ընկերության տեղի ղեկավարն արդեն լքել է Իրանի տարածքը:
Իրանի իշխանությունները պնդում էին, որ շվեդական ընկերությունը վնաս է հասցնում երկրի ազգային անվտանգությանը: Իրանում օգոստոսին արդեն փակվել է այդ ընկերության ներկայացուցչությունը: Ըստ ընկերության ֆինանսական տնօրեն Գեբրիել Բեննեթի` սա, հավանաբար, կապված է այն հանգամանքի հետ, որ Oriflame-ի բիզնես մոդելները թույլ են տալիս կանանց աշխատել ուղիղ վաճառքների ոլորտում, այսինքն` բիզնեսի իրականացում եւ ապրանքի վաճառք` վաճառողից անմիջապես գնորդին` կանոնավոր առեւտրային կետերից դուրս: Ընկերության տվյալներով, ավելի քան 40 հազար իրանցի կանայք աշխատում էին այս համակարգով: