Ընդդիմություն լինելը վատ բան չէ, և չի նշանակում, որ ով ընդդիմություն է, ուրեմն լավը չէ, չի նշանակում, որ ով իշխանություն է, ուրեմն ամենավատն է: Ես կարծում եմ՝ երբ մենք խոսում ենք, որ պետք է ունենանք ինստիտուցիոնալ ընդդիմություն, ինստիտուցիոնալ իշխանություն, խնդիրը նրա մեջ է, որ չպետք է անձնավորենք քաղաքական պայքարը, պետք է լինի գաղափարների պայքար և չպետք է նույնացնենք իշխանություն և պետություն, իշխանություն և հայրենիք, ինչպես նաև ընդդիմություն և հասարակություն: Մենք պետք է կարողանանք առաջ շարժվել, ինչպես դասական նորման ժողովրդավարական երկրներում է: Այսօր ԱԺ արտահերթ նիստից հետո լրագրողների հետ զրույցում ասաց փոխխոսնակ Էդուարդ Շարմազանովը:
Նա նաև նշեց, որ խորհրդարանում տեսնում է առողջ ուժեր, որոնք կարող են Հայաստանը տանել այդ ճանապարհով, որտեղ ցանկացած ընտրություն չի լինի ցնցում:
Մեր հարցին` ստացվեց ԲՀԿ-ն ինստիտուցիոնալ պայքար չէր ծավալում, դրա համա՞ր իշխանությունը մեկ գիշերում չեզոքացրեց, Էդուարդ Շարմազանովը պատասխանեց. «Չեմ ուզում խոսել ԲՀԿ-ի մասին, քանի որ այն, ինչ խոսել եմ, խոսել եմ մտածված, տվել եմ բացառապես քաղաքական գնահատական և այսօր էլ կարող եմ այն, ինչ ասել եմ, դրա տակ ստորագրել: Եթե պայքարը լիներ գաղափարական, մեկ քաղաքական գործչի միտինգ անելու հրաժարումից հետո մնացած քաղաքական ընդդիմադիր ուժերը չէին հայտնվի քաղաքական խաղից դուրս վիճակում»,- ասաց նա:
Մեր դիտարկմանը, որ իշխանությունների կողմից կոշտ գործիքներ կիրառվեցին ԲՀԿ-ի նկատմամբ, Շարմազանովը չհամաձայնվեց. «Դուք լսե՞լ եք պարոն Ծառուկյանի խմբակցությունից որևիցե մեկից հայտարարություն, որ իրենց ղեկավարի նկատմամբ տեղի է ունեցել, ինչպես դուք եք ասում, կոշտ, կոպիտ, անօրինական գործիքների կիրառում: Ես չեմ լսել: Չեմ կարծում, որ ինքը տենց ճնշվող անձնավորություն է, կամ` 37 հոգանոց ֆրակցիան: Մի հատ հիշեք իրենց հայտարարությունը, կարելի՞ է ճնշել իրենց: Ես իրենց դեմքերին նայում եմ` շատ երջանիկ, ուրախ: Հիշո՞ւմ եք` բոյկոտից մեկը արտասանելով հեռացավ, մյուսը` երգելով, ինչի՞ մասին է խոսքը»:
Ավելին՝ տեսանյութում:
