Թուրքիայում լույս է տեսել Իբրահիմ Օզթեքի «Հայկական հարցը 100-րդ տարում» աշխատությունը, որը Հայոց ցեղասպանությունը ժխտող հերթական գիրքն է։ Հաղորդում է թուրքական «Իհլաս» լրատվական գործակալությունը։
Օզթեքը գրքում նշում է, որ Առաջին աշխարհամարտի ժամանակ հայերը կռվել են ֆրանսիացիների, անգլիացիների և ռուսների կողքին՝ թուրքական բանակի դեմ։ Նա նշում է, որ հայերը զոհվել են պատերազմի, սովի և տարածված հիվանդությունների պայմաններում՝ Հայոց ցեղասպանության հարցում առաջ քաշելով թուրքական պաշտոնական թեզը։
«Թուրքական գենում ցեղասպանություն չկա»,- գրում է հեղինակը։
Նշենք, որ հատկապես վերջին տարիներին տպագրվել է մեծ քանակությամբ հակահայ բովանդակությամբ գիտական գրականություն: Բազմահատորյա գրքերը թարգմանվում են այլ լեզուներով և ինտենսիվորեն տարածվում արտասահմանյան տարբեր կառույցներում, ուսումնական հաստատություններում:
2015 թվականին ընդառաջ՝ Թուրքիայում զգալիորեն ակտիվացել է նման գրականության տպագրությունը, ինչպես նաև այլ գիտական նախաձեռնությունները, որոնց հիմնական նպատակը Ցեղասպանության փաստի ժխտումն է:
Թուրքական լոբբին զգալիորեն ակտիվացրել է աշխատանքները հատկապես Միացյալ Նահանգներում: Վերջին շաբաթներին արդեն լույս են տեսել ժխտողական բովանդակության մի քանի գիրք, նախատեսվում կամ արդեն անցկացվում են համաժողովներ, սեմինարներ, այլ միջոցառումներ:
