Թուրքական Zaman թերթի հաղորդմամբ, Թուրքիայի վարչապետ Ռեջեփ Թայիփ Էրդողանը Անկարայում հրապարակել է Լիբիայում իրավիճակի կարգավորման շուրջ «ճանապարհային քարտեզ»:
Վերջինս բաղկացած է 3 կետից: Այդ պլանով նախատեսվում է գործընթացի խաղաղ կարգավորում, որը հիմնված պետք է լինի Լիբիայի տարածքային ամբողջականության ու ինքնիշխանության սկզբունքների հիման վրա:
Բացի այդ, պետք է վերջ տրվի լիբիական ժողովրդի դեմ իրականացվող հարձակումներին և զինադադարի ռեալ ամրագրման ու մարդասիրական օգնության առաքման համար Լիբիայում պետք է ստեղծվեն մի շարք անվտանգ գոտիներ:
Եվ, վերջապես Լիբիայում պետք է իրականացվեն լայնամասշտաբ ժողովրդավարական բարեփոխումներ, որոնք լիբիական ժողովրդին հնարավորություն կընձեռեն այսուհետ ընտրելու իր ղեկավարներին և ճանապարհ կհարթեն սահմանադրական կարգի հաստատման համար:
Հիշեցնենք, որ վերջին տարիներին Էրդողանն արաբական աշխարհում ստանձնել է «մարդու իրավունքների պաշտպանի» դերը և արժանացել արաբական աշխարհի մեծ դրվատանքին: Սակայն, չգիտես ինչու, Էրդողանը «մոռանում» է նույն դերը ստանձնել առաջին հերթին սեփական երկրում, ուր կոպտորեն ոտնահարվում են ազգային փոքրամասնությունների (հայերի, քրդերի և այլոց) իրավունքները:
