Արարատի և Վայոց Ձորի մարզերի ընդհանուր իրավասության դատարանում Թաթուլ Պողոսյանի նախագահությամբ ավարտվել է
Սառա Ե.-ի (անունը փոխված է) գործի դատական քննությունը:
1996 թվականի մայիսին ծնված Սառան մեղադրվել է ակնհայտ սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
2014 թվականի հուլիսի 6-ին 18-ամյա Սառան ոստիկանությունում հաղորդում է տվել, թե երկու օր առաջ՝ հուլիսի 4-ին, գիշերվա ժամը 2-ին Երևան քաղաքի բնակիչ ոմն Արթուր տատիկի երևանյան տանը իր կամքին հակառակ սեռական հարաբերություն է ունեցել իր հետ, որի ընթացքում հարվածել է իրեն ու պատճառել ֆիզիկական ցավ:
Հուլիսի 8-ին Սառայի հաղորդման առնչությամբ նյութերն ուղարկվել են Երևանի Էրեբունու քննչական բաժին, որտեղ հարուցվել է վարույթ՝ ոմն Արթուրի կողմից Սառային բռնաբարելու դեպքի առիթով:
Քննության արդյունքում սեպտեմբերի 19-ին քննիչը որոշում է կայացրել հայտնաբերված Արթուրի նկատմամբ ՀՀ քրեական օրենսգրքի 138 հոդվածի 1-ին մասով՝ հանցադեպի բացակայության հիմքով քրեական հետապնդում չիրականացնելու մասին:
Հոկտեմբերի 8-ին որոշում է կայացվել ծանր հանցագործության կատարման համար մեղադրելու հետ զուգորդված հանցագործության մասին Սառա Ե.-ի կողմից սուտ մատնություն կատարելու փաստով նոր քրեական գործ հարուցելու մասին:
Պարզվել է, որ Սառան իր մատնանշած օրը՝ 2014 թվականի հուլիսի 4-ին, Արթուրի բնակարանում իր կամքով է սեռական հարաբերություն ունեցել ու սեքսուալ բնույթի գործողություններ կատարել նույն այդ Արթուրի հետ: Հետո էլ անձնական դրդապատճառներով մեղադրել է նրան բռնաբարության համար:
Ընդհանուր իրավասության դատարանում Սառան իրեն լիովին մեղավոր է ճանաչել ու միջնորդել, որ գործը քննվի արագացված ընթացակարգով:
Արագացված ընթացակարգով գործի քննության արդյունքում դատարանը Սառա Ե.-ին մեղավոր է ճանաչել ակնհայտ սուտ մատնություն կատարելու համար և դատապարտել է 1 տարի ազատազրկման:
Դատարանը կիրառել է պայմանական դատապարտություն և սահմանել է 1 տարի փորձաշրջան՝ պարտավորեցնելով Սառային՝ առանց համապատասխան ստորաբաժանման թույլտվության՝ չփոխել բնակության վայրը, նշանակված օրերին ներկայանալ վերահսկողություն իրականացնող ստորաբաժանում: