2013թ. հունվարին, 2012թ. դեկտեմբերի համեմատ, ՀՀ սպառողական շուկայում արձանագրվել է 2.9% գնաճ, ինչը մեծապես պայմանավորվել է պարենային ապրանքների 4.9% գնաճով: Ինչպես այսօր ասուլիսի ժամանակ հայտնեց Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը, ոչ պարենային ապրանքների գները նշված ժամանակահատվածում նվազել են 0.2%-ով, իսկ ծառայությունների ոլորտում սակագներն աճել են 0.8%-ով:
Այս տարվա հունվարին, նախորդ տարվա հունվարի համեմատ, սպառողական գներն աճել են 2.6%-ով, այդ թվում՝ պարենային ապրանքներինը (ներառյալ ոգելից խմիչք և ծխախոտ)` 1.9%-ով, ոչ պարենային ապրանքներինը` 6.0%-ով, ծառայությունների սակագները` 2.2%-ով:
Գ. Մարտիրոսյանի խոսքով՝ գնաճի ամենաբարձր ցուցանիշը եղել է Վաղարշապատում, իսկ մայրաքաղաքում գներն աճել են 2.9%-ով:
ԱՎԾ պաշտոնյան նկատեց, որ այս տարվա հունվարին, 2012թ. դեկտեմբերի համեմատ, հանրապետությունում արձանագրվել է պարենային ապրանքների 5.1% գնաճ, ինչի վրա իր անմիջական ազդեցությունն է թողել մրգի, բանջարեղենի և կարտոֆիլի ապրանքախմբերի 11.8-31.8% գնաճը: Դիտարկվող պարենային 13 ապրանքախմբերից 9-ում նշված ժամանակահատվածում գրանցվել է 0.1-31.8% գնաճ, իսկ 4-ում` 2.0-0.1% գնանկում:
