Ադրբեջանի ԱԳՆ ղեկավար Էլմար Մամեդյարովը հանդիպել է Վրաստանի նախագահ Գեորգի Մարգվելաշվիլիի հետ: Այս մասին հայտնում է «Գրուզիա Օնլայն»-ը:
Մարգվելաշվիլին ասել է, որ Ադրբեջանի և Վրաստանի միջև ռազմավարական գործընկերության կապերը մեծ նշանակություն ունեն տարածաշրջանի համար: Նա նշել է, որ այդ երկու երկրները հաջողությամբ համագործակցում են ինչպես երկկողմ, այնպես էլ եռակողմ ձևաչափով, որը միավորում է Ադրբեջանը, Վրաստանը և Թուրքիան:
Մամեդյարովի խոսքով՝ իրականացվող լայնամասշտաբ էներգետիկ և տրանսպորտային նախագծերը ծառայում են 2 երկրների անկախության ամրապնդմանը, զարգացմանը և տարածաշրջանի բարգավաճմանը:
Մամեդյարովը հայտարարել է, որ Բաքու-Թբիլիսի-Կարս երկաթուղու նախագիծը ավանդ է ներդնում մեր երկրների տարածաշրջանային դիրքերի ուժեղացման ջանքերում, և որ Միջին Ասիայի երկրները ևս լուրջ հետաքրքրություն են ցուցաբերում այդ նախագծի նկատմամբ: Նա ընդգծել է եռակողմ հիմունքով ադրբեջանա-վրացա-թուրքական համագործակցության նշանակությունը:
Հանդիպման ընթացքում կողմերը տարածքային ամբողջականության, ինքնիշխանության և Ադրբեջանի ու Վրաստանի՝ միջազգային մակարդակով ճանաչված սահմանների անձեռնմխելիությանը փոխադարձ աջակցություն են հայտնել:
