Ռուսաստանի և ՆԱՏՕ-ի հարաբերություններում 2013 թվականին սպասվում են լավ նորություններ: Այդ մասին այսօր հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը՝ փոխանցում է ITAR-TASS-ը:
«2013-ին ես լավ նորությունների եմ սպասում: Մենք ընդունել ենք Ռուսաստան-ՆԱՏՕ խորհրդի համագործակցության համապարփակ ծրագիր, որը պարունակում է մի շարք նոր տարրեր»,- ընդգծել է նա:
Ինչ վերաբերում է հակահրթիռային պաշտպանության համակարգերի շուրջ իրավիճակին, Ռասմուսենը հույս է հայտնել, որ Ռուսաստանն ու հյուսիսատլանտյան դաշինքը կարող են 2013-ին այդ բանակցություններում առաջընթացի հասնել:
«Դրան կնպաստի անցած տարվա ընթացքում ԱՄՆ-ում և Ռուսաստանում քաղաքական իրավիճակների հստակեցումը»,- ասել է Ռասմուսենը՝ նկատի ունենալով երկու երկրներում էլ նախագահական ընտրությունների անցկացումը:
Գլխավոր քարտուղարը հիշեցրել է, որ 2010 թվականին Լիսաբոնում կայացած Ռուսաստան-ՆԱՏՕ գագաթնաժողովի ընթացքում դաշինքը Ռուսաստանին համագործակցության էր հրավիրել հակահրթիռային պաշտպանության ոլորտում: «Այդ հրավերը ուժի մեջ է: Ես հավատում եմ, որ նման համագործակցությունը լիովին համապատասխանում է Ռուսաստանի և ՆԱՏՕ-ի ժողովուրդների շահերին»,- եզրափակել է Ռասմուսենը: