Վայոց ձորի մարզպետ Հարություն Սարգսյանը որևէ մտահոգվելու առիթ չի տեսնում Եղեգնաձորի քաղաքապետ Դավիթ Հարությունյանի հետ աշխատելու հարցում: Բանն այն է, որ Հ. Սարգսյանը Հանրապետական կուսակցության անդամ է, իսկ Դ. Հարությունյանը՝ «Բարգավաճ Հայաստան» կուսակցության անդամ է:
Վերջերս, ինչպես հայտնի է, բավականին սրվել են այս երկու կուսակցությունների հարաբերությունները: Անցած շաբաթ ՀՀԿ խորհրդի նիստում Սերժ Սարգսյանի հայտնի հայտարարություններից հետո այդ երկու կուսակցությունների անդամները միմյանց հասցեին փոխադարձ վիրավորական հայտարարություններ են հնչեցնում:
Հայտնի է, որ ԲՀԿ-ն Հայաստանում որոշ համայնքապետեր ունի: Օրինակ` Հայաստանի մեծությամբ երկրորդ քաղաքի՝ Գյումրիի քաղաքապետ Սամվել Բալասանյանը ԲՀԿ անդամ է: Ավելին` ժամանակին Ս. Սարգսյանը հայտարարել էր, թե նա «մեր թեկնածուն է»: ԲՀԿ անդամ է նաև Իջևանի քաղաքապետ Վարդան Ղալումյանը, Եղեգնաձորի քաղաքապետ Դավիթ Հարությունյանը, Աբովյանի քաղաքապետ Կարապետ Գուլոյանը: Կան նաև ԲՀԿ-ական մի շարք գյուղապետեր: Եվ այս լարվածության շրջանակներում բավականին հետաքրքիր է, թե ինչպես են ընթանալու ԲՀԿ-ական այս քաղաքապետերի ու պետական վերադաս պաշտոնյաների, ասենք` մարզպետների հետ հարաբերությունները:
Ճիշտ է, քաղաքապետերն ու գյուղապետերը ընտրովի պաշոնյաներ են, և այդ առումով ի տարբերություն նշանակովի պաշտոնյաների` համարվում են որոշակիորեն անկախ, բայց Հայաստանում գոյություն ունեցող իրականությունը բոլորովին այլ է: Հայաստանում մարզպետը համարվում է քաղաքապետերի վերադասը: Եվ թե՛ քաղաքական, թե՛ պաշտոնական հարցերում պետք է որոշակի զիջումների գնալ ղեկավարներին, ովքեր այլ կուսակցության անդամ են: «Ժամանակը» երեկ փորձեց վերը նշված մարզերի ղեկավարներից պարզել, թե այս լարված իրավիճակում իրենք ինչպես են շարունակելու իրենց աշխատանքային հարաբերությունները:
ԲՀԿ-ական քաղաքապետերի հետ ընդհանրապես հնարավոր չեղավ կապ հաստատել: Առայժմ հնարավոր եղավ հեռախոսազրույց ունենալ Վայոց ձորի և Տավուշի մարզպետներ Հարություն Սարգսյանի և Հովիկ Աբովյանի հետ: Վերջինս մեզ հետ զրույցում ասաց, թե իրենք «չեն մտածում ուժային որևէ բան կիրառել»: Հիշեցնենք, որ մարզում Իջևանի քաղաքապետը ԲՀԿ անդամ Վարդան Ղալումյանն է: Արդյոք Հ. Աբովյանը Ս. Սարգսյանի հայտարարություններից հետո կարո՞ղ է նույն աշխատելաոճը պահպանել ԲՀԿ-ական քաղաքապետի հետ, թե՞ այս հարաբերություններում նույնպես որոշակի սրացումներ են սպասում, ինչպես անցած շաբաթ դա տեղի ունեցավ ՀՀԿ-ի և ԲՀԿ-ի ղեկավարներ Սերժ Սարգսյանի և Գագիկ Ծառուկյանի միջև: «Եկեք չկանխատեսենք, թե ինչ կարող են անել, ինչ կարող է չլինել: Մենք միմյանց աշխատանքը չենք խոչընդոտում, քանի որ մեր բոլոր գործառույթները հստակեցված են», – ասաց Հ. Աբովյանը:
Հայտնի է, որ Տավուշի մարզը Հայաստանի ամենաաղքատ մարզերից է: Ոչ իշխանական եռյակը` ԲՀԿ-ի հետ միասին Ս. Սարգսյանի հայտարարությունից հետո արդեն պատրաստվում է հանրահավաք ու զանգվածային այլ միջոցառումներ անցկացնել: Հ. Աբովյանը չունի՞ մտավախություն, որ գործընթացների ակտիվացման արդյունքում Վ. Ղալումյանի օգնությամբ իր մարզի դժգոհ բնակչությունը կհամախմբվի ոչ իշխանական ուժերի շուրջ, կմասնակցի մարզային ու մայրաքաղաքային հանրահավաքներին: «Մեր մարզն այնքան էլ քաղաքականացված չէ: Եթե տիրապետում եք տեղեկատվությանը, մեր մարզից ընդամենը 58 հոգի են ներկա եղել աշնան այն հանրահավաքին, որի դեպքում ասում էին, թե երեսուն հազար մարդ է հավաքվել»,- պատասխանեց Հ. Աբովյանը:
Առայժմ մտահոգվելու խնդիր չի տեսնում նաև Վայոց ձորի մարզպետ Հարություն Սարգսյանը: Վերջինս վստահեցրեց, թե իր կուսակից ղեկավարներն իրեն չեն հանձնարարել խոչընդոտել Եղեգնաձորի ԲՀԿ-ական քաղաքապետ Դավիթ Հարությունյանի գործունեությունը: «Նա համայնքի ղեկավար է, մենք իրար հետ աշխատում ենք, ինչ խնդիր պետք է առաջանա: Նա որպես քաղաքապետ աշխատելու է իր իրավունքների ու լիազորությունների մեջ, ես որպես մարզպետ՝ իմ իրավունքների ու լիազորությունների մեջ: Իսկ կուսակցական գործունեության դեպքում էլ մենք մեր կուսակցության գործունեությամբ ենք զբաղվելու, իրենք՝ իրենց»,- ասաց Հ. Սարգսյանը: Իսկ հանրահավաքներ կամ բողոքի այլ ակցիաներ անցկացնելու դեպքում էլ նա ավելացրեց, որ «որևէ մեկը որևէ մեկին չի կարող կանգնեցնել: «Կամ եթե ցանկություն չունենան գնալ հանրահավաքի, չենք կարող ստիպել, որ գնան»,- ասաց Հ. Սարգսյանը:
