«Առաջին լրատվական»-ի զրուցակիցն է Հիմնադիր խորհրդարանի անդամ Վարդան Հակոբյանը:
– Պարոն Հակոբյան, ի պատասխան Սերժ Սարգսյանի հայտարարությունների՝ ԲՀԿ առաջնորդ Գագիկ Ծառուկյանը հայտարարեց, թե առաջիկայում կլինեն արտահերթ նախագահական ընտրությունների պահանջով հանրահավաքներ: Հիմնադիր խորհրդարանն իրեն այս գործընթացներում որևէ կերպ պատկերացնո՞ւմ է:
– Ես հիմա իրավասու չեմ խոսել Հիմնադիր խորհրդարանի անունից, որովհետև այդ մասով մենք քննարկում և նիստ չենք ունեցել: Բայց ես կարող եմ իմ կարծիքն ասել որպես Հիմնադիր խորհրդարանի պատգամավոր. մեր ֆորմատի մեջ չի մտնում ԲՀԿ կարգի ֆինանսական կառույցի հետ որևէ միջոցառում անցկացնել, եթե նույնիսկ դա վերաբերում է Սերժ Սարգսյանի պահանջին: Արդյունքում մեկ է՝ ռեժիմի առումով ոչինչ չի փոխվելու, որովհետև իրենք նույն ռեժիմի տարբեր կողմերն են: Այլ հարց է, որ այս օրերին իրենք ինչ-որ բան իրար մեջ չեն կիսել, մենք չենք պատրաստվում դա վերածել մեծ խնդրի:
Մեր ֆորմատն ուրիշ է՝ մենք ազգային-ազատագրական պայքար ենք պատկերացնում, որովհետև մենք գաղութացված ենք, և գաղութացումից դուրս գալու համար պետք է ազգային-ազատագրական պայքար և ոչ միայն իշխանափոխություն: Իսկ Սարգսյան-Ծառուկյան հակամարտության մեջ ազգային-ազատագրական պայքարի տարր անգամ չկա՝ ընդամենը անձերի փոփոխության խնդիր է դրված: Ընդ որում՝ երկու բևեռներն էլ անվերապահ ենթարկվում են գլխավոր գաղութարարին՝ Ռուսաստանին: Գուցե կփոխվեն դերակատարները, բայց ոչ երկրի ֆորման:
– Կարծում եք՝ այդ սուր քննադատությունները պայմանավորված են միայն նրանով, որ ինչպես Դուք ասացիք՝ ինչ–որ բան իրար մեջ չե՞ն կիսել:
– Ես կխնդրեի՝ նայեիք այդ հայտարարությունների ժամանակացույցին: Դրանք տեղի ունեցան Ծառուկյանի՝ Մոսկվա կատարած այցից հետո: Նա այնտեղ հանդիպումներ ունեցավ Քոչարյանի և ռուս պաշտոնյաների հետ: Իշխանությունները միանգամից ջղաձգվեցին՝ մտածելով, որ գուցե դավադրություն է տեղի ունեցել իրենց դեմ, և պետք է միանգամից չեզոքացնել այսօրվա հիմնական հակառակորդին, որի միջոցով,- համենայնդեպս հանրապետականներն այդպես են մտածում,- Ռուսաստանն ուզում է հեռացնել Սերժ Սարգսյանին: Չնայած ես չեմ կարծում. եթե Պուտինն ուզենար Սերժ Սարգսյանին հեռացնել, ապա ընդամենը մեկ զանգով դա կաներ: Բայց քանի որ այնտեղ խմորումների կասկածանք կա, կարծում եմ՝ հանրապետականների ջղաձգումներն այս կոնտեքստի մեջ են:
– Մինչև հիմա Մոսկվան կարծես նախընտրել և ինչ–որ չափի աջակցություն է ցույց տվել իշխանություններին, կարծում եք՝ ինչ–որ փուլում կարո՞ղ է օգնել:
– Դուք սկզբից ճիշտ ասացիք՝ Մոսկվան աջակցում է իշխանություններին, բայց մի մոռացեք, որ «Բարգավաճը» նույնպես իշխանություն է: Եռյակը, բացի «Ժառանգությունից», անվերապահ իր ծառայությունն է առաջարկել Մոսկվային, Մոսկվային էլ հիմա առաձնապես միևնույն է, թե ինչ կառավարիչ կլինի՝ գուցե մեկը, ով մի քիչ ավելի ադեկվատ է, քան Սերժ Սարգսյանը, ով վաղուց արդեն իրավիճակին չի տիրապետում:
