Արարատի և Վայոց Ձորի մարզերի ընդհանուր իրավասության դատարանի դատավոր Լևոն Արազյանի վարույթում է Գագիկ Մահլամյանի գործի քննությունը:
Գագիկ Մահլամյանը մեղադրվում է հարազատ եղբորը՝ Գենետիկ Մահլամյանին դիտավորյալ սպանելու համար: Եղբայրների գենետիկ ընդհանրությունը չի խոչընդոտել հանցագործության կատարմանը:
Ըստ մեղադրանքի՝ 2014 թվականի հունիսի 28-ին, ժամը 14-ի սահմաններում Վեդի քաղաքի բնակիչ Գենետիկ Մահլամյանը իր տան երկրորդ հարկի պատուհանից տեսել է, որ եղբայրը՝ Գագիկը, անցնում է տան հետնամասով:
Գենետիկն ու Գագիկը, առաջադրված մեղադրանքի համաձայն, երկար տարիներ ընտանեկան ու կենցաղային հարցերի շուրջ լարված փոխհարաբերությունների մեջ են եղել: Երբ Գենետիկը դեպքի օրը Գագիկին դիտողություն է արել տան հետնամասով անցնելու համար, եղբայրների խոսակցությունը վերածվել է վիճաբանության:
Ըստ մեղադրանքի՝ Գագիկ Մահլամյանը, գտնվելով ալկոհոլի ազդեցության տակ, հայհոյելով բարձրացել է տան երկրորդ հարկ:
Գագիկի մուտքն իր բնակարան կանխելու համար Գենետիկի կինը՝ Սեդան, ծածկել է մուտքի դուռը, Գագիկից պահանջել է ներս չմտնել, հեռանալ, բայց Գագիկ Մահլամյանը հրելով բացել է դուռը, Սեդա Մահլամյանի կամքին հակառակ մուտք է գործել նրա տուն, վեճի է բռնվել նախասրահում գտնվող եղբոր՝ Գենետիկի հետ:
Ըստ մեղադրանքի՝ Գագիկը սպանության սպառնալիքներ է տվել եղբորը, բռունցքներով, ապա խոհանոցային տախտակով հարվածներ է հասցրել նրա գլխին, մարմնի տարբեր մասերին՝ գանգուղեղային փակ, բութ վնասվածքի, քթի, կոպի, գլխի մաշկի արյունազեղումների, գլխուղեղի կողմնային, ուղեղիկի արտաքին ու ստորին մակերեսների ենթաոստանային արյունազեղումների, ուղեղանյութում, երկարավուն ուղեղում և ուղեղիկում կետային արյունազեղումների, դեմքի, ձեռքերի քերծվածքների ձևով պատճառել է մարմնական վնասվածքներ, գլխուղեղի կենսական կարևոր ֆունկցիաների սուր խանգարում:
Ստացած վնասվածքներից Գենետիկ Մահլամյանը մահացել է:
Գագիկ Մահլամյանին մեղադրանք է առաջադրվել ՀՀ քրեական օրենսգրքի 104 հոդվածի 1-ին և 147 հոդվածի 1-ին մասերով:
Նրա խափանման միջոցը կալանավորումն է:
