Վերակառուցման և Զարգացման Եվրոպական Բանկը /ՎԶԵԲ/, աջակցելով ՀՀ ազգային արժույթով վարկավորման զարգացմանը, տրամադրել է Կոնվերս Բանկին սինթետիկ վարկ՝ 5 մլն ԱՄՆ դոլարին համարժեք ՀՀ դրամ գումարի չափով, որն ուղղվելու է միկրո, փոքր և միջին բիզնեսի վարկավորմանը:
Սինթետիկ վարկի շրջանակներում ՎԶԵԲ-ը ֆինանսավորում է տրամադրում ԱՄՆ դոլար արժույթով, մինչդեռ Կոնվերս Բանկի վարկային պարտավորությունը վերջինիս նկատմամբ կազմում է տրամադրված ֆինանսավորման գումարի համարժեքը ՀՀ ազգային արժույթով: Նման կառուցվածքը թույլ կտա Կոնվերս Բանկին ընդլայնել ազգային արժույթով տրամադրվող վարկերի պորտֆելը՝ հաշվի առնելով փոքր և միջին բիզնեսի՝ ազգային արժույթով երկարաժամկետ վարկավորման աճող պահանջարկը, միևնույն ժամանակ զերծ պահելով ՓՄՁ-ներին արտարժույթով վարկավորման հետ կապված արտարժութային ռիսկերից:
Կոնվերս Բանկի հիմնական նպատակներից է հաճախորդներին բարձր որակի տարատեսակ ֆինանսական ծառայությունների մատուցման միջոցով նպաստել Հայաստանի տնտեսական զարգացման աճին: Այդ սկզբունքի համաձայն, ՎԶԵԲ-ից ստացված սինթետիկ վարկը հնարավորություն կտա տրամադրել ՓՄՁ-ներին ազգային արժույթով երկարաժամկետ ֆինանսավորումներ: Տվյալ մոտեցման արդյունքում բանկի հաճախորդները կստանան բազմաթիվ արտոնություններ, ինչը կնպաստի նրանց բիզնեսի զարգացմանը:
Նշենք նաև, որ այս նախագիծը արդեն չորրորդն է ՎԶԵԲ-ի և Կոնվերս Բանկի համագործակցության շրջանակներում: 2008թ. նոյեմբերին Կոնվերս բանկը ստացել է 10 մլն ԱՄՆ դոլար վարկ միկրո, փոքր և միջին բիզնեսի ֆինանսավորման նպատակով: 2009թ. մարտին կնքվել է «Trade Finance Facility» պայմանագիրը, համաձայն որի Կոնվերս Բանկը ՎԶԵԲ-ի կողմից ճանաչվել է Առևտրի աջակցության ծրագրի շրջանակներում որպես թողարկող բանկ: 2011թ. մայիսին կնքվել է Վերականգնվող վարկային պայմանագիրը (RCA), որի ներքո տրամադրված վարկային սահմանաչափը նախատեսվում է ուղղել ներմուծման-արտահանման գործարքների ֆինանսավորմանը:
2013թ. ևս նախատեսվում է շարունակել սերտ համագործակցությունը ՎԶԵԲ-ի հետ: