Սիրիայի հարևան պետություններ Լիբանանը և Հորդանանը հայտարարել են, որ իրենց անհրաժեշտ է միջազգային հանրության շտապ օգնությունը` սիրիացի փախստականների հարցը լուծելու համար,- հաղորդում է RIA Novosti-ն:
Հորդանանի թագավոր Աբդալլահ Երկրորդը Քուվեյթում սկսված միջազգային դոնորային համաժողովի շրջանակներում հայտարարել է, որ իր երկիրն ընդունում և օգնություն է տրամադրում հարյուրհազարավոր սիրիացի փախստականների, ինչն արդեն գերազանցում է երկրի հնարավորությունները: Նա կոչ է արել միջազգային հիմնադրամ ստեղծել փախստականներին, այդ թվում՝ նաև սիրիացի, օգնելու համար:
Լիբանանի վարչապետ Միշել Սուլեյմանը հայտարարել է, որ սպառվել են պետության՝ առանց այդ էլ համեստ հնարավորությունները, սակայն փախստականները շարունակում են ժամանել Լիբանան:
«Չնայած դրան, Լիբանանի կառավարությունը չի փակում սահմանը և չի արտաքսում սիրիացի ու պաղեստինցի փախստականներին»,- ասել է Սուլեյմանը: Նա միջազգային հանրությանը, մասնավորապես արաբական երկրներին կոչ է արել կիսել սիրիացի փախստականների համար պատասխանատվությունը, ընդ որում, ոչ միայն ֆինանսական առումով: Մասնավորապես, նա դիմել է արաբական պետություններին` խնդրելով ժամանակավորապես ընդունել սիրիացի և պաղեստինցի փախստականներին:
Նշենք, որ Քուվեյթում մեկնարկած համաժողովը հրավիրվել է ՄԱԿ-ի նախաձեռնությամբ, և, ֆորումի կազմակերպիչների խոսքերով, դրա նպատակն է հավաքել 1.5 միլիարդ դոլար Սիրիայի բնակչությանը մարդասիրական օգնություն ցուցաբերելու համար:
Ֆորումին մասնակցում են 59 պետությունների պատվիրակություններ։
