Վրաստանի նախագահ Միխեիլ Սաակաշվիլին Վրաստանի պաշտպանության ազգային ակադեմիայի դասավանդողների հետ հանդիպման ժամանակ բերել է պարսատիկ,- հաղորդում է «Գրուզիա Օնլայն»-ը:
Սաակաշվիլին ասել է, որ իր հետ բերել է այն, ինչ այսքան տարիներ պահել է, և նշել, որ պարսատիկն իրեն տվել է սպաներից մեկը պաշտպանություն նախարարություն կատարած այցի ժամանակ:
«Դա խորհրդանիշն էր այն բանի, թե այն ժամանակ ինչ էին իրենցից ներկայացնում զինված ուժերը: Ահա այսպես էին սպառազինված Վրաստանի զինված ուժերը 2004 թ.»,- ասել է Սաակաշվիլին և հավելել, որ այնուհետև առաջ եկան սպառազինության այլ տարրեր:
Նախագահի խոսքերով` Վրաստանն այժմ ունի օդային պաշտպանության համակարգ, ցամաքային համակարգեր, զրահատեխնիկա և ամենակարևորը` ԱՄՆ-ի հետ նոր ծրագիր, որի օգնությամբ Վրաստանի զինված ուժերը մոտակա տասնամյակում հարստացվելու են նոր արևմտյան տեխնիկայով:
2000-ական թթ. սկզբին Վրաստանի պաշտպանության նախարար Դավիթ Թևզաձեն (1998-2004 թթ.) Վրաստանի ՀՀՊ համակարգը համեմատել էր պարսատիկի հետ: Սաակաշվիլին նշել է, որ այդ ժամանակաշրջանում պաշտպանության նախարարության բյուջեն կազմել է 30 միլիոն դոլար, իսկ այժ մեծացել է մի քանի անգամ: Մասնավորապես, այս տարի նախարարության բյուջեն կազմում է 410 միլիոն դոլար:
«Վրաստանն այլևս երբեք չպետք է ունենա միայն պարսատիկ: Մեկընդմիշտ դա պետք է մնա անցյալում»,- ընդգծել է Սաակաշվիլին։
