Թուրքական Emlakkulisi.com կայքի փոխանցմամբ, հայտնի է դարձել Կարսում գտնվող և հայ-թուրքական բարեկամությունը խորհրդանշող հուշարձանի ապամոնտաժման շուրջ մարտի 7-ին հայտարարված տենդերի հաղթողը: Ապամոնտաժումը վստահվել է «Ավշին» ընկերությանը, որը դրա դիմաց ստանալու է 272.000 թուրքական լիրա (մոտ 179.000 ամերիկյան դոլար):
Ապամոնտաժման աշխատանքները սկսվելու են առաջիկա 15 օրերի ընթացքում: Հուշարձանը քանդվելու է մաս-մաս:
Հիշեցնենք, որ հունվարի սկզբներին Կարս այցելած Թուրքիայի վարչապետ Էրդողանն այդ հուշարձանն անվանեց «անճոռնի» և հրահանգեց ապամոնտաժել այն:
Ի դեպ, Կարսի նախկին քաղաքապետ Նաիֆ Ալիբեյօղլուն, որի օրոք էլ կառուցվել է հուշարձանը, վերջերս հայտարարեց, որ հուշարձանի ապամոնտաժման խնդրանքով Էրդողանին դիմել է Ադրբեջանի նախագահ Իլհամ Ալիևը:
