Այսօր «ՆԱՍԴԱՔ ՕԷՄԷՔՍ Արմենիա»-ում կայացավ «ՍԱՍ ԳՐՈՒՊ» ՍՊԸ-ի պարտատոմսերի ցուցակման արարողությունը:
2013թ. հունվարի 29-ից «ՍԱՍ ԳՐՈՒՊ» ՍՊԸ-ի անվանական արժեկտրոնային պարտատոմսերը ցուցակվել են «ՆԱՍԴԱՔ ՕԷՄԷՔՍ Արմենիա»-ի կողմից և ընդգրկվել Bbond ցուցակում: Այս թողարկումը ներառում է 10 ԱՄՆ դոլար անվանական արժեքով, 24 ամիս մարման ժամկետով և 10.1% տարեկան եկամտաբերությամբ 700 հազար պարտատոմս: Պարտատոմսերը բորսայում կշրջանառվեն SASGB1 բորսայական հապավումով:
Պարտատոմսերի այս թողարկման տեղաբաշխումը իրականացրել է «Ամերիաբանկ» ՓԲԸ-ն:
«Ամերիա» ընկերությունների խմբի ներդրումային և բանկային գործառնությունների վարչության տնօրեն Առնո Մուսիկյանը հայտնեց, որ պարտատոմսերի գնորդների 25%-ը ոչ ռեզիդենտներ են, 75%-ը՝ ռեզիդենտներ, 1 ներդրող եղել է նույնիսկ Շվեյցարիայից, ակտիվ են եղել նաև ռուսաստանաբնակ ներդրողները:
«Կապիտալի շուկայում տարածաշրջանային կենտրոն դառնալու առումով կարող ենք կայացած համարվել»,- ասաց Ա. Մուսիկյանը:
Նա նշեց, որ «ՍԱՍ ԳՐՈՒՊ»-ի պարտատոմսերի նկատմամբ պահանջարկը գերազանցել է սպասումները, և իրենք ստիպված են եղել այլ ներդրողների մասնաբաժինները նվազեցնել:
«ՍԱՍ ԳՐՈՒՊ» ՍՊԸ-ի գործունեության հիմնական ուղղությունը մանրածախ առևտուրն է: Ընկերությանն է պատկանում ՀՀ տարածքում դինամիկ տեմպերով զարգացող «ՍԱՍ» սուպերմարկետների ցանցը, որը գործարկել է Հայաստանում միակ օնլայն սուպերմարկետը՝ sas.am: