«168 Ժամ» թերթը գրում է. «Ներքաղաքական կյանքը գնալով հետաքրքիր ու նաև զվարճալի է դառնում: Երեկ հերթական ուրախության առիթն ընթերցել է ԱԺ նախագահ Գալուստ Սահակյանը, ով լրատվամիջոցներից մեկին տված հարցազրույցում անդրադառնալով ԲՀԿ նախագահ Գագիկ Ծառուկյանի նախօրեի ելույթին՝ հայտարարել է, թե՝ «ԲՀԿ ղեկավարին հրամցրել էին շատ բառերով բեռնած, դժվարընթեռնելի մի նյութ, որի տրամաբանական կառուցվածքը կաղում էր, իսկ ներքին հակասություններն աղաղակող էին»: «Տպավորություն ստացա, որ մի քանի հոգի են աշխատել ու մեխանիկորեն կպցրել իրար»,- ասել է Գալուստ Սահակյանը: Թե ով կամ ովքեր են գրել Գագիկ Ծառուկյանի ելույթը, այլ հարց է: Սակայն, երբ այդ մասին խոսում է Գալուստ Սահակյանը, ով Հայաստանի քաղաքական դաշտում «դժվարըմբռնելի» մտքերի անվիճելի առաջատարն է, դա իսկապես զվարճալի է: Իհարկե, հնարավոր է՝ այսպիսով իշխանությունը ցանկանում է ցույց տալ, որ լուրջ չի ընդունում Գագիկ Ծառուկյանի կողմից հնչեցված քննադատությունն ու սպառնալիքները:
Այսինքն՝ Ծառուկյանին պատասխանում է Սահակյանով: Սակայն դա նույնքան անլրջացնում է իշխանությանը: Անկախ նրանից՝ ով ինչպես է վերաբերվում ԲՀԿ-ին ու Ծառուկյանին, այսօրվա իրողությունն այն է, որ նա ի վիճակի է, ինչպես ինքն է ասում, հարյուր-հազարավոր քաղաքացիների հանել փողոց: Մի կողմ թողնենք նաև այն հանգամանքը, որ տնտեսական մենաշնորհի, կոռուպցիայի մասին խոսում է Հայաստանի ամենախոշոր գործարարներից մեկը, ով, ի դեպ, նաև Անվտանգության խորհրդի անդամ է: Թե ով է գրել հասարակության դժգոհությունների մասին Ծառուկյանի ելույթի տեքստը, կրկնում ենք, այլ հարց է: Դրանից չի հետևում սակայն, որ Հայաստանում բացակայում է այն քաղաքական, սոցիալ-տնտեսական, բարոյահոգեբանական բացասական ֆոնը, որին հղում անելով՝ Ծառուկյանը խոսում է իշխանափոխության մասին: Իշխանությունը, սակայն, պատասխանում է մոտավորապես այսպես, «մենք վատն ենք, բայց մեր դեմ պայքարողները՝ ի դեմս Ծառուկյանի, ավելի վատն են»: Սա ծիծաղելի է գրեթե այնքան, որքան Գալուստ Սահակյանի դատողությունները՝ «դժվարընթեռնելիության» մասին:
Ամբողջությամբ՝ թերթի այսօրվա համարում։
