Հյուսիսատլանտյան դաշինքը հերքել է լիբիական ապստամբների կողմից իրենց ուղղված անգործության մեղադրանքները: Այս մասին հայտնում է Associated Press գործակալությունը:
ՆԱՏՕ-ում հիշեցրել են, որ ավիահարվածների թվաքանակն ամեն օր աճում է, այդ իսկ պատճառով այդ մեղադրանքներն անհիմն են:
Մասնավորապես, ինչպես նշում է Դաշինքի ներկայացուցիչ Կարմեն Ռոմերոն, չորեքշաբթի օրը` ապրիլի 6-ին, նախատեսված է կոալիցիոն ուժերի ավելի քան 200 թռիչք: Նախօրեին այդ թիվը եղել է 186, իսկ երկուշաբթի օրը` 137:
«Առաջին լրատվականն» այսօր ավելի վաղ տեղեկացրել էր, որ մեղադրանքների մասին հայտարարել էր Լիբիայի ազգային-ազատագրական բանակի գլխավոր շտաբի պետ Աբդ Ալ-Ֆաթահ Յունուսը` ելույթ ունենալով Բենղազիում: Նա նաև ասել էր, որ իրենց սպաները ՆԱՏՕ-ի հրամանատարությանն անմիջապես փոխանցում են հակառակորդի դիրքավորման տվյալները, սակայն անհրաժեշտ գործողությունները ժամանակին չեն իրականացվում: Յունուսը նույնիսկ սպառնացել էր, որ Լիբիայի ընդդիմադիր Անցումային ազգային խորհուրդը գործողությունները դադարեցնելու համար կարող է դիմել ՄԱԿ-ին:
