Բրիտանացի միլիարդատեր Ռիչարդ Բրենսոնը հինգշաբթի օրը հայտարարել է զբոսաշրջիկների թռիչքների համար նոր տիեզերանավի կառուցումը սկսելու մասին՝ հայտնում է TASS-ը: Տիեզերանավը կփոխարինի նման նախորդ սարքին, որը ջարդվել է անցած տարի՝ փորձարկումների ժամանակ:
Բրենսոնն ասել է, որ իրեն պատկանող The Spaceship Company ընկերությունն ԱՄՆ-ում սկսել է երկրորդ SpaceShip Two նավի կառուցումը: Նրա խոսքով՝ իր ընկերությունը մտադիր է նույն տիպի երրորդ սարքի կառուցումը սկսել արդեն 2015թ.:
«Մենք աշխատում ենք աշխարհում առաջին կոմերցիոն տիեզերական գծի ստեղծման և տիեզերանավերի նավատորմի գործարկման մասին երազանքը կյանքի կոչելու ուղղությամբ»,- հայտարարել է Բրենսոնը: «Մեր երկրորդ տիեզերանավը կառուցում և փորձարկում է լիովին մեզ պատկանող The Spaceship Company ընկերությունը,- հավելել է նա:- Միասին մենք փոփոխություններ ու բարելավումներ ենք կատարում, որոնք, ինչպես մենք ենք կարծում, անհրաժեշտ են սարքի անվտանգությունը բարձրացնելու համար»:
Կառուցվող երկրորդ SpaceShip Two-ն, ըստ ծրագրերի, փոձնական թռիչքները կսկսի արդեն այս տարի: Այս մասին ավելի վաղ հայտարարել է Բրենսոնին պատկանող Virgin Galactic ընկերությունը, որը կզբաղվի նավի կոմերցիոն շահագործմամբ:
Virgin Galactic-ը հայտարարում է, որ տիեզերական զբոսաշրջիկների առաջին խումբը մերձերկրյա տարածություն մտադիր է ուղարկել 2016թ.:
Ենթադրվում է, որ SpaceShip Two-ն թռիչքներ կիրականացնի 100 կմ բարձրության վրա ենթաուղեծրային հետագծով: Այդպիսի թռիչքի արագությունը սարքին թույլ չի տալիս Երկրի արհեստական արբանյակ դառնալ, բայց ուղևորներին հնարավորություն է տալիս անկշռության զգացում ունենալ:
Ենթադրվում է, որ երկժամյա թռիչքը կարժենա մոտ 250.000 դոլար: Տիեզերանավում կարող են տեղավորվել 2 օդաչու և 6 ուղևոր: Տիեզերքում այդ կերպ լինելու ցանկություն է հայտնել արդեն ավելի քան 800 մարդ, այդ թվում՝ դերասաններ Թոմ Հենքսը, Էշթոն Քաթչերը, Անջելինա Ջոլին, երգչուհիներ Լեդի Գագան և Քեթի Փերին: Բրենսոնի խոսքով՝ տիեզերանավի առաջին ուղևորները պետք է լինեին ինքը և իր 2 երեխաները:
Հոկտեմբերի 31-ին նման սարքը կործանվել է ԱՄՆ Կալիֆոռնիա նահանգում՝ Մոհավե անապատի երկնքում փորձնական թռիչքի ժամանակ:
Օդաչուներից մեկը՝ Մայքլ Օլսբերին, զոհվել է, երկրորդ օդաչուն՝ Փիթեր Սիբոլդը, կարողացել է կատապուլտի ենթարկվել ու փրկվել: Նախնական տվյալներով՝ տիեզերանավի աղետի պատճառը կարող էր լինել արգելակման համակարգի վաղաժամ միացումը:
