Al-Arabiya-ն հայտնում է, որ Իրանի նախագահ Ահմադինեժադին չի հաջողվել կատարել իր գլխավոր խոստումները՝ նվազեցնել հարուստների և աղքատների միջև գոյություն ունեցող ճեղքը և կրճատել աղքատության մակարդակը:
Այդ խոստումները նա ժողովրդին տվել էր 2005 թ., երբ դարձել էր երկրի նախագահ: 2013 թ. Ահմադինեժադը կհեռանա նախագահի պաշտոնից՝ ետևում թողնելով իրանցիների կյանքի պայմանների վատթարացման, ազգային դրամի արժեզրկման, առաջին անհրաժեշտության մթերքների գնաճի և աղքատության մակարդակի բարձրացման հարցերը:
Իրանի հասարակության աղքատ շրջանակներին զայրացնում է այն, որ ներկայումս հարուստներն ավելացնում են իրենց կարողությունները, համաշխարհային ավտոմոբիլային արտադրողներից գնում են շքեղ մեքենաներ, զվարճանում են Թեհրանի փողոցներում այն դեպքում, երբ երկրում ծանր տնտեսական իրավիճակ է` պայմանավորված տնտեսական խիստ պատժամիջոցների կիրառմամբ:
Financial Times-ի տվյալներով՝ Թեհրանում ավելացել է Porsche մոդելի ավտոմեքենաների թիվը: Ամբողջ երկրում կա Porsche-ի 1,5 հազար բարձրակարգ մեքենա: Նախորդ 9 ամիսների ընթացքում այդ մեքենաների ներմուծման ծավալները մեծացել են մինչև 13,5 %-ով հենց այն ժամանակ, երբ սրվել էր տնտեսական ճգնաժամը, գների աճի պատճառով դժգոհություններ էին առաջացել և տեղական դրամի արժեզրկում էր տեղի ունեցել: Իրանում ձևավորվել է նոր վերնախավ, որը կարողանում է սեփական երկրի նկատմամբ միջազգային պատժամիջոցների կիրառման հետևանքով առաջացած իրավիճակից օգուտներ քաղել:
Խոսքը սննդի ներմուծման և այն ներքին շուկայում սպառելու մասին է, որը տարեկան կտրվածքով գնահատվում է 60 մլրդ դոլար: Այդ վերնախավը շահել է նավթագազային պայմանագրերից, որոնք կնքվել են օտարերկրյա ընկերությունների հետ` շրջանցելով երկրի նկատմամբ կիրառվող պատժամիջոցները:
Նույնիսկ Ահմադինեժադը խորհրդարանի առաջ անցյալ շաբաթ խոստովանել է, որ Իրանի հիմնական խնդիրներից մեկը սահմանափակ թվով մարդկանց խմբի ձեռքում երկրի կապիտալի կենտրոնացվածությունն է: Նախագահի խոսքերով՝ երկրի տնտեսության բոլոր ոլորտները մենաշնորհային կերպով գտնվում են 4 հազար առանձին անհատների ձեռքում:
Իրանի Իսլամական Հանրապետությունից նավթի արտահանումը միջազգային պատժամիջոցների հետևանքով նվազել է մինչև օրական 1 մլն բարել:
