Քաղաքագետ և ընտրական տեխնոլոգիաների փորձագետ Արմեն Բադալյանը «Առաջին լրատվական»-ի հետ զրույցում խոսելով ՀՀ նախագահի թեկնածուներ Անդրիաս Ղուկասյանի և Պարույր Հայրիկյանի հայտարարած հացադուլի և Հայաստանում պայքարի այդ միջոցի արդյունավետության մասին` կարծիք հայտնեց, որ հացադուլ հայտարարելիս շատ կարևոր է, թե ով է հացադուլ անում և ինչ պահանջ է ներկայացնում:
«Հացադուլը քաղաքական գործընթացներում՝ ինչպես Հայաստանում, այնպես էլ աշխարհի տարբեր երկրներում, օգտագործվում է որպես պայքարի միջոց, բայց եթե հացադուլը անհատի կողմից է կիրառվում, ապա այդ անհատը առնվազն պետք է հայտնի գործիչ լինի: Օրինակ՝ հացադուլ էր անում Նելսոն Մանդելան, և դա արձագանք ստացավ ոչ միայն տվյալ երկրում,այլ նաև ամբողջ աշխարհում: Եթե հացադուլ են անում ոչ այնքան հայտնի մարդիկ, ապա պետք է այդ հացադուլ անողների քանակը բավականին շատ լինի, որպեսզի որևէ արձագանք ստանա: Պետք է նշվի նաև հացադուլի կարևոր կետերից մեկը՝ հիմնական նպատակը, որպեսզի մարդիկ իմանան, թե նա կոնկրետ ինչի է ձգտում հասնել:
Ինչ վերաբերում է Հայաստանին, ապա այստեղ այն մի փոքր ծաղրական բնույթ է ստացել: Վերջին մի քանի տարիների ընթացքում մարդիկ հացադուլ են անում՝ ներկայացնելով այնպիսի պահանջներ, որոնք կամ անհասկանալի են, կամ էլ անիրականանալի»,- նշեց քաղաքագետը:
Խոսելով կոնկրետ նախագահական ընտրությունների նախաշեմին հացադուլ հայտարարելու մասին` Ա. Բադալյանը կարծում է, որ նախընտրական այս անհետաքրքիր և արդեն կանխորոշված ապագայով քաղաքական գործընթացի ժամանակ, որը կոչվում է քարոզարշավ, հացադուլը, ինչպես նաև այլ մեթոդները ընդամենը ուշադրություն գրավելու խնդիր են լուծում:
«Մեկը պատահական վարսավիրանոցում մազերն է կտրում, մյուսը` հացադուլ հայտարարում, այսինքն` ինչ-որ ուշադրություն գրավելու խնդիր են ցանկանում լուծել, սակայն ոչ մի արդյունք դա չի ունենում, որովհետև կոնկրետ այն մարդը, որը հացադուլ է հայտարարել, չունի այն քաղաքական կշիռը, որ իր արած գործողությունը որևէ արժեք ունենա: Դա էլ, բնականաբար, արժանանում է հասարակաության անտարբերությանը, չնայած լրատվամիջոցները այդ մարդկանց շատ էլ լավ «ռասկռուտկա» են անում:
Ինչպես Անդրիաս Ղուկասյանը, այնպես էլ Պարույր Հայրիկյանը քաղաքականության մեջ ազդեցիկ քաղաքական գործիչներ չեն, և բնական է, որ անարդյունավետ է նաև նրանց հայտարարած հացադուլը»:
Փորձագետի գնահատմամբ՝ երբ անցյալ տարվա դեկտեմբերին ԲՀԿ և ՀԱԿ առաջնորդներ Գագիկ Ծառուկյանն ու Լևոն Տեր-Պետրոսյանը հայտարարեցին, որ չեն մասնակցելու նախագահական ընտրություններին, այդ ընտրությունները փաստացի ավարտվեցին, և հիմա պարզապես ժամանակը ձգելու խնդիր է լուծվում:
«Հասկանալի է և պարզ, թե փետրվարի 18-ին ով է լինելու նախագահ: Իսկ ընդհանուր առմամբ Հայաստանի սոցիալ-տնտեսական իրավիճակն այնպիսին է, որ մարդկանց 30 տոկոսն առանց հայտարարելու է հացադուլ անում»,- իր խոսքն ավարտեց Ա. Բադալյանը:
