ԵԽԽՎ հայաստանյան պատվիրակության անդամ, Ժառանգություն կուսակցության ներկայացուցիչ Զարուհի Փոստանջյանը լուրջ չի վերաբերվում ԵԽԽՎ համազեկուցողների, մասնավորաես, Պրեսկոտի հայտարարություններին`անկախ նրանից դրանք խիստ են, թե ոչ:
«Առաջին լրատվական»-ի հետ զրույցում տիկին Փոստանջյանը նշեց. «Որևէ տեղաշարժ չկա մարտի 1-ի սպանությունների գործերով: Ինչ գնահատական ուզում է տան, միևնույն է, ԵԽԽՎ զեկուցողներն ինքն են այստեղ թերացել, երբ ժամանակին իրենց գնահատականներն արդարացի չէին:
Անգամ ԵԽԽՎ-ում շրջանառության մեջ է դրվել, որ իշխանությունները, ի դեմս Ռոբերտ Քոչարյանի, ՀՀ զինված ուժերն ապօրինի օգտագործել է ներքաղաքական իրադարձություններում, զինված ուժերի օգտագործման հետևանքով զոհվել է պարտադիր զինվորական ծառայության մեջ գտնվող զինծառայող: Շատ բազմաթիվ հարցեր կան, որոնց ԵԽԽՎ-ում փաստաթղթի տեսքով անդրադարձ է կատարվել և մինչև օրս դրանց պատասխան չի տրվել: Եվ ԵԽԽՎ-ն էլ հետամուտ չի եղել իր փաստաթղթերի իրականացմանը: Այնպես որ, շատ ճիշտ կլիներ, եթե Պրեսկոտն անդրադարձ կատարեր հենց այդ հարցերին:
Բացի այդ, արդեն ավելի քան երկու տարի է Հայաստանի հարցը չի քննարկվել ԵԽԽՎ-ում: Ես ցավում եմ, որ Հայաստանի հարցը ԵԽԽՎ-ում վերջին անգամ քննարկվել է 2009 ամռանը, և այս տարվա աշնանային նստաշրջանում նոր կքննարկվի, այսինքն` հազիվ երկու տարին մեկ անգամ են մեզ անդրադառնում»,-ասաց նա:
