Թուրքական Radikal թերթի փոխանցմամբ, Մարդու իրավունքների եվրոպական դատարանը (ՄԻԵԴ) բավարարել է գրել-կարդալ չիմացող, ինչպես նաև թուրքերենին չտիրապետող քուրդ կնոջ հայցն ընդդեմ Թուրքիայի:
ՄԻԵԴ-ը Թուրքիային պարտավորեցրել է 2800 եվրո փոխհատուցում վճարել Սուլթան Շամանին: Վերջինս մեղադրվել է Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) անդամ լինելու մեջ:
Ձերբակալվելուց հետո Շամանը պահանջել է իրեն տրամադրել փաստաբան և թարգմանիչ, սակայն մերժում էր ստացել: Դրանից հետո թուրքական դատարանը նրան դատապարտել էր 6 տարի 3 ամիս ազատազրկման:
Բացի այդ, ՄԻԵԴ-ը պահանջել է վերանայել Շամանի դատավճիռը:
Հիշեցնենք, որ 2010 թվականին ՄԻԵԴ-ում ստացված բողոքների քանակով Թուրքիան հայտնվել էր «պատվավոր» եռյակում: Նախորդ տարի ամենաշատ բողոքները ստացվել էին Ռուսաստանից` 40.295 բողոք, ապա գալիս էին Թուրքիան (15.206 բողոք) և Ռումինիան (11.950 բողոք):
Իսկ 2009 թվականին «առաջատար» քառյակում ընդգրկվել էին Ռուսաստանը, Թուրքիան, Ուկրաինան և Ռումինիան:
