Գողության համար 5.5 տարվա անազատության դատապարտված` HSBC բանկի նախկին աշխատկից Աշոտ Առուշանյանի 12 հարազատ երեք օր է՝ նախագահական նստավայրի դիմաց անժամկետ հացադուլի են նստած:
Նրանցից մեկի ինքնազգացողությունն այսօր վատացավ, և նրան տեղափոխեցին հիվանդանոց, իսկ մյուսները դեռ շարունակում են հացադուլը:
Նրանք վճռաբեկ դատարանից պահանջում են արդարացի դատական ակտ կայացնել, արդարացնել Աշոտ Առուշանյանին և անհապաղ ազատ արձակել:
Հիշեցնենք, որ Աշոտ Առուշանյանը մեղադրվում է «Մանանա գրեյ» ընկերությունից գողութուն կատարելուն օժանդակելու համար: Ըստ մեղադրանքի՝ Աշոտն իր ընկերոջը բանկի համակարգչից համապատասխան տեղեկատվութուն է տվել, որի հիման վրա էլ գողություն է կատարվել:
Վերաքննիչ դատարանը մեկ անգամ արդեն իսկ բեկանել է գործը և ուղարկել առաջին ատյան՝ նոր քննության, սակայն նորից նույն դատավճիռն է կայացվել: Նոյեմբերի 27-ին վերաքննիչ դատարանը նորից դատավճիռը թողել է անփոփոխ, և հիմա գործը վճռաբեկ դատարանում է:
«Մենք ուզում ենք, որ Աշոտ Առուշանյանն անհապաղ ազատ արձակվի, քանի որ ոչ մի հիմք, ոչ մի ապացույց չկա: Ուղղակի որևէ մեկի քմահաճույքն ու պատվերն է կատարվում: Չգիտեմ ով է պատվիրատուն, բայց որ պատվեր է, դա հաստատ է»,-ասաց Աշոտ Առուշանյանի մայրը՝ Անահիտ Առուշանյանը:
Նա նշեց, որ իրենց հացադուլն անժամկետ է: Իրենք կմնան այնքան ժամանակ, մինչև Սերժ Սարգսյանն իրենց ընդունի և լսի բոլոր մանրամասները, քանի որ վստահ են, որ նախագահին գործը ճիշտ չեն զեկուցում:
