Այսօր մինչև ժամը 18.00-ը Վրաստանում հայ քաղբանտարկյալ Վահագն Չախալյանն ազատ կարձակվի: Այս մասին «Առաջին լրատվական»-ի հետ զրույցում տեղեկացրեց «Բազմազգ Վրաստան» շարժման ղեկավար Առնոլդ Ստեփանյանը: Նա ընդգծեց, որ նման արդյունքի հասնելու գործում մեծ դեր խաղացին Վրաստանում հայկական կազմակերպությունների ջանքերը, մասնավորապես` այս գործում անգնահատելի է հայկական եկեղեցու, առաջնորդարանի, Վրաստանում հայերի կոնգրեսի և այլ հայկական կազմակերպությունների, ջավախահայերի ներդրումը:
«Արդեն որոշում է կայացվել, որ նա ազատ է արձակվում, ես գնում եմ Ռուսթավի, որտեղի կալանավայրում էլ գտնվում է Վահագն Չախալյանը»,- հստակեցրեց Առնոլդ Ստեփանյանը:
Հիշեցնենք, որ Վրաստանում հայ քաղբանտարկյալ, «Միասնական Ջավախք» կազմակերպության ղեկավար Վահագն Չախալյանին առաջադրված հոդվածների վրա տարածվում էր համաներման օրենքը, որն ընդունվել էր 2012թ. դեկտեմբերի 21-ին` Վրաստանի խորհրդարանի կողմից: Սակայն բացի օրենքներից` նրա ազատ արձակման համար անհրաժեշտ էր նաև քաղաքական կամք:
«Առաջին լրատվական»-ի հետ զրույցում ավելի վաղ Առնոլդ Ստեփանյանն ասել էր, որ Վրաստանի քաղաքական կուսակցությունների մեծ մասը, այդ թվում` «Միասնական ազգային շարժում» կուսակցությունը և ԱԺ մի շարք խմբակցություններ դեմ են նրա ազատ արձակմանը, ուստի այդ հարցը դեռևս բարդ է: